వేతనాల పెంపు, పని ఒత్తిడి తగ్గించాలంటూ విశాఖ కలెక్టరేట్‌ వద్ద అంగన్వాడీల నిరసన

విశాఖపట్నం కలెక్టరేట్‌ వద్ద అంగన్వాడీ ఉద్యోగులు వేతనాల పెంపు, యాప్ ఆధారిత పని ఒత్తిడి తగ్గించాలని డిమాండ్ చేస్తూ భారీగా నిరసన చేపట్టారు. నల్ల చీరలు ధరించిన వందలాది మంది అంగన్వాడీ కార్యకర్తలు జగదాంబ జంక్షన్ నుంచి కలెక్టరేట్ వరకు సాష్టాంగ ప్రమాణాలు చేసుకుంటూ ర్యాలీగా వచ్చి గేట్ల వద్ద ధర్నా చేశారు. ప్రధాన డిమాండ్‌గా కనీస వేతనం అమలు చేయాలని, సుప్రీంకోర్టు సూచించిన రూ.26,000 వేతనం ఇవ్వాలని కోరారు.

కార్యకర్తలు మాట్లాడుతూ, గత వైఎస్ఆర్‌సీపీ ప్రభుత్వంతో పాటు ప్రస్తుత కూటమి నేతలు చంద్రబాబు, పవన్‌ కల్యాణ్, లోకేశ్‌ కూడా ఎన్నికల సమయంలో తమ టెంట్ల వద్దకు వచ్చి వేతనాలు పెంచుతామని హామీ ఇచ్చారని, అయితే రెండేళ్లు గడిచినా ఇప్పటివరకు ఒక్క రూపాయి పెంచలేదని ఆరోపించారు. 2019 నుంచి వేతనాలు మారలేదని, ధరలు తీవ్రంగా పెరిగాయని చెప్పారు. కనీస వేతనం ఇంత ఇస్తామని ప్రకటించలేదని, ప్రభుత్వం హామీ ఇస్తూనే కాలయాపన చేస్తోందని విమర్శించారు.

వేతనంతో పాటు నవచేతన యాప్‌తో పెరిగిన పనిభారాన్ని తగ్గించాలని, హెల్త్‌ డిపార్ట్‌మెంట్ చేయాల్సిన చిన్నారుల స్క్రీనింగ్‌ బాధ్యతలు తమకు అప్పగించడం సరికాదని అన్నారు. 24 గంటలూ సెంటర్‌లోనే గడపాల్సి వస్తోందని, యాప్‌లు, ఫోన్‌ల వల్ల తీవ్ర ఒత్తిడికి గురవుతున్నామని, దీంతో ఇటీవలి కాలంలో పలువురు కార్యకర్తలు గుండెపోటుతో మరణించిన ఘటనలున్నాయని ఆవేదన వ్యక్తం చేశారు.

ధర్నా నేపథ్యంలో పోలీసులు గేట్లు మూసివేశారు, ప్రధాన గేటు వద్ద కార్యకర్తలు బైఠాయించారు. జిల్లా అధికారులు అక్కడికి చేరుకుని నిరసనకారులతో చర్చలు ప్రారంభించారు, కానీ స్పష్టమైన హామీ ఇంకా రాలేదు. రాతపూర్వక హామీ వచ్చేవరకు ఆందోళన కొనసాగుతుందని అంగన్వాడీలు తెలిపారు. ప్రభుత్వం అధికారికంగా స్పందించాల్సి ఉంది.