కాకినాడలో ఎస్ఐఆర్ ప్రక్రియ: 66.5% డిజిటైజేషన్ పూర్తి, ప్రజల సహకారం కోరిన కలెక్టర్

కాకినాడ జిల్లాలో ఓటర్ల సమగ్ర సవరణ (SIR) ప్రక్రియ వేగంగా కొనసాగుతోంది. జిల్లా కలెక్టర్ హరేంద్ర ప్రసాద్ ఈటీవీతో మాట్లాడుతూ పురోగతి వివరాలు తెలిపారు.

జిల్లా వ్యాప్తంగా 16,50,811 మంది ఓటర్లకు ఎన్యుమరేషన్ ఫారాలు 100% పంపిణీ చేశామని, తిరిగి వాటిని బీఎల్ఓలు ఇంటింటికీ వెళ్లి సేకరిస్తున్నారని కలెక్టర్ తెలిపారు. ఫొటోతో పాటు ఓటరు వివరాలు నమోదు చేస్తూ, 2002 నాటి ఓటరు జాబితాతో లింకు చేస్తున్నారు.

ఇప్పటివరకు 10,16,000 మంది (66.5%) వివరాలను డిజిటైజ్ చేశారు. 2002 జాబితాతో 97% మ్యాపింగ్ విజయవంతమైంది. మిగతా 3% మంది వివరాలు చెప్పలేకపోవడం లేదా పేరు సరిగా నమోదు కాకపోవడంతో మ్యాపింగ్ సాధ్యపడలేదని కలెక్టర్ వివరించారు.

ఆ 3% మందికి డ్రాఫ్ట్ రోల్లో పేరు ఉన్నా, నోటీసు పంపిస్తామని, ఎన్నికల కమిషన్ సూచించిన 14 రకాల ధృవీకరణ పత్రాల్లో ఏదో ఒకటి సమర్పిస్తే ఫైనల్ రోల్లో ఓటు హక్కు కల్పిస్తామని చెప్పారు. డ్రాఫ్ట్ రోల్ ప్రకటించాక ప్రజలు సరిచూసుకోవాలన్నారు.

బీఎల్ఓలు ఇంటికి వచ్చినప్పుడు రేపు రండి వెళ్లండి అనడంతో వారిపై పనిభారం పెరుగుతోందని, ప్రజలు సకాలంలో ఫొటోతో ఫారం సిద్ధం చేసి అందించాలని కలెక్టర్ కోరారు. ఓటరు ఐడీ నంబర్ గుర్తుంటే 2002 జాబితాతో లింకు సులభమవుతుందని తెలిపారు.