నెల్లూరు జిల్లా గొట్టిప్రోలు కోటదిబ్బకు జాతీయ వారసత్వ గుర్తింపు

కేంద్ర సాంస్కృతిక శాఖ నెల్లూరు జిల్లా గొట్టిప్రోలు గ్రామంలోని కోటదిబ్బ ప్రాంతాన్ని జాతీయ ప్రాముఖ్యత కలిగిన పురావస్తు కేంద్రంగా ప్రకటించింది. ఈ మేరకు ఉత్తర్వులు జారీ చేసింది. ఈ ప్రదేశంలో శాతవాహనుల కాలం నాటి ఆనవాళ్లు బయటపడినట్లు పురావస్తు అధికారులు తెలిపారు.

2019లో పురావస్తు శాఖ అధికారులు ఇక్కడ తవ్వకాలు జరిపారు. ఈ తవ్వకాల్లో పెద్ద ఇటుకలతో నిర్మించిన గోడలు, విష్ణుమూర్తి విగ్రహం, నాణ్యమైన నలుపు-ఎరుపు రంగుల మట్టి పాత్రలు, ధాన్యం నిల్వ గుంతలు, రాతి పనిముట్లు లభించాయి. ఈ ఇటుకలు అమరావతి, నాగార్జునకొండ ప్రాంతాల్లో ఉపయోగించిన వాటిని పోలి ఉండటం విశేషం. 2020లో మరోసారి తవ్వకాలు జరిపినప్పుడు 2 మీటర్ల వెడల్పు గోడలు, బావులు కనిపించాయి.

కోటదిబ్బ సముద్రతీరానికి, స్వర్ణముఖి నదికి దగ్గరగా ఉండటంతో ఇది పురాతన వాణిజ్య కేంద్రంగా విలసిల్లినట్లు భావిస్తున్నారు. దీని చుట్టుపక్కల గొట్టిప్రోలు బౌద్ధ స్తూపం వంటి పురావస్తు ఆనవాళ్లు ఉన్నాయి. దుగరాజుపట్నం నుంచి పడవల ద్వారా కూడా ఇక్కడి ప్రాంతం నుంచి నూలు వస్త్రాలు ఎగుమతి అయ్యేవని తెలుస్తోంది.

కేంద్రం ఈ ప్రాంతంలోని సర్వే నెంబర్ 235లో 4.28 ఎకరాలు, 131/1లో 19.94 ఎకరాలను సంరక్షిత జాతీయ వారసత్వ స్థలంగా గుర్తించింది. దీని నిర్వహణ నేషనల్ మాన్యుమెంట్స్ అథారిటీ చూస్తుంది. ప్రస్తుతం ఈ ప్రదేశం పిచ్చి మొక్కలతో నిండి ఉండగా, సంరక్షణ చర్యలు చేపట్టనున్నారు.

గ్రామస్థులు ఈ నిర్ణయాన్ని స్వాగతించారు. ఈ గుర్తింపు వల్ల స్థానికంగా అభివృద్ధి, పర్యాటకం పెరుగుతుందని ఆశిస్తున్నారు.