AP తీరం వైపు మరో వాయుగుండం.. నవంబర్ 2-4న భారీ వర్షాలు

బంగాళాఖాతంలో మరో అల్పపీడనం ఏర్పడుతోంది. ఇది బలపడి వాయుగుండంగా మారి ఆంధ్రప్రదేశ్ తీరం వైపు కదిలే అవకాశం ఉంది. నవంబర్ 2, 3 తేదీల్లో రాష్ట్రంలో భారీ వర్షాలు కురిసే సూచనలు కనిపిస్తున్నాయి.

దక్షిణ అండమాన్ సముద్రం, థాయిలాండ్ తీరం దగ్గర ద్రోణి కొనసాగుతోంది. రాబోయే 24 గంటల్లో ఇది అల్పపీడనంగా మారవచ్చు. ఆ తర్వాత తీవ్ర అల్పపీడనం, వాయుగుండం, తీవ్ర వాయుగుండంగా కూడా బలపడే అవకాశం ఉంది. ఈ వ్యవస్థ పశ్చిమ-వాయువ్య దిశగా కదులుతూ ఏపీ తీరం వైపు రానుంది.

నవంబర్ 2 రాత్రి 10 గంటల ప్రాంతంలో ఈ వాయుగుండం కోనసీమ దగ్గర తీరం దాటే అవకాశం ఉంది. అదే రోజు భీమవరం, కాకినాడ ప్రాంతాల్లో ఈ వ్యవస్థ ప్రభావం ఉంటుందని అంచనా. నవంబర్ 2 నుంచి 4 వరకు కోనసీమ, కాకినాడ, మచిలీపట్నం, యానం జిల్లాల్లో భారీ నుంచి అతి భారీ వర్షాలు కురుస్తాయి.

ఉత్తరాంధ్రలోని అనకాపల్లి, విజయనగరం, విశాఖపట్నం జిల్లాల్లోనూ భారీ వర్షాలు కురవనున్నాయి. రాజమహేంద్రవరం, పిఠాపురం, నర్సీపట్నం, అల్లూరి, మన్యం ప్రాంతాలకూ భారీ వర్ష హెచ్చరిక ఉంది. తెలంగాణ జిల్లాల్లో కూడా కొద్దిగా వర్షాలు కురిసే అవకాశం ఉంది.

ఇంతకుముందు ఆర్నాబ్ తుఫాను కోనసీమ తీరం దగ్గర తీరం దాటింది. ఆ తుఫాను ప్రభావంతో విద్యుత్ స్తంభాలు, చెట్లు, ఇళ్లు దెబ్బతిన్నాయి. సుమారు 10 మంది మృతి చెందినట్టు సమాచారం ఉంది. పంట నష్టం తీవ్రంగా జరిగింది. దీనిపై రాష్ట్ర ప్రభుత్వం కేంద్రాన్ని సహాయం కోరింది. కోనసీమలో రెండు రోజుల పాటు విద్యుత్ సరఫరా నిలిచిపోయింది.

ఆర్నాబ్ ప్రస్తుతం బీహార్, ఉత్తరప్రదేశ్ ప్రాంతంలో బలహీనపడి వర్షాలు కురిపిస్తోంది. అక్టోబర్ 30-31 నాటికి అది నేపాల్, హిమాలయాల వైపు వెళ్లి మామూలు ద్రోణిగా మారుతుంది. కొత్త వ్యవస్థపై భారత వాతావరణ శాఖ ఇంకా పూర్తి బులెటిన్ విడుదల చేయలేదు. ఈ వ్యవస్థను IMD పర్యవేక్షణలో ఉంచింది. ప్రజలు అప్రమత్తంగా ఉండాలని, వాతావరణ బులెటిన్లను గమనించాలని సూచించారు.