బంగాళాఖాతంలో మరో అల్పపీడనం.. 24 గంటల్లో వాయుగుండంగా బలపడే అవకాశం

బంగాళాఖాతంలో మరో అల్పపీడనం ఏర్పడింది. ఉపరితల ఆవర్తన ప్రభావంతో దక్షిణ అండమాన్ ప్రాంతంలో ఈ అల్పపీడనం ఏర్పడిందని వాతావరణ శాఖ తెలిపింది.

రానున్న 24 గంటల్లో ఇది పశ్చిమ వాయువ్య దిశగా కదిలే అవకాశం ఉంది. అండమాన్ నికోబార్ దీవుల పరిసర ప్రాంతాల్లో ఈ వ్యవస్థ అల్పపీడన ప్రాంతంగా బలపడే సూచనలు కనిపిస్తున్నాయి.

అల్పపీడనం బలపడితే వాయుగుండంగా మారుతుంది. అది మరింత బలపడితే తుఫానుగా మారుతుంది.

ఈ నేపథ్యంలో మరో 24 గంటల్లో ఆగ్నేయ బంగాళాఖాతంలో ఈ వ్యవస్థ వాయుగుండంగా బలపడే అవకాశం ఉందని వాతావరణ శాఖ అంచనా వేస్తోంది.