జలధార జలహారతి పనులు 100 రోజుల్లో పూర్తి చేయాలని సీఎం చంద్రబాబు ఆదేశం

ముఖ్యమంత్రి చంద్రబాబు నాయుడు జలధార జలహారతి పథకం పనులు 100 రోజుల్లో పూర్తి చేయాలని కలెక్టర్లను ఆదేశించారు. ఈ మేరకు కలెక్టర్లు స్వయంగా పర్యవేక్షించాలని సూచించారు.

రాష్ట్రంలో నీటి భద్రత సాధించడంపై సీఎం దృష్టి సారించారు. వివిధ నీటి వనరుల బేసిన్లను అనుసంధానం చేసి మిగులు నుంచి లోటు ప్రాంతాలకు నీటిని తరలించాలని సూచించారు. స్థానిక అవసరాలకు నిల్వ సామర్థ్యం మెరుగుపరచాలని పేర్కొన్నారు.

జలవనరుల శాఖ అధికారులకు ఆయన మైక్రో బేసిన్ కనెక్టివిటీపై అధ్యయనం చేయాలని ఆదేశించారు. శాస్త్రీయ డేటా ఆధారిత విధానంతో నీటి వనరులను గరిష్టంగా వినియోగించుకోవాలన్నారు.

భూగర్భ జలాల రీచార్జ్ కోసం వివిధ జిల్లాల్లో అమలైన ఉత్తమ విధానాలను ఇతర జిల్లాల్లో అనుసరించాలని సీఎం సూచించారు. నంద్యాల, కర్నూలు జిల్లా కలెక్టర్లు ప్రదర్శించిన కాస్కేడ్ పునరుద్ధరణ కార్యక్రమాలను అభినందించారు.

ఎల్నినో నేపథ్యంలో వాతావరణాన్ని తట్టుకునే వ్యవసాయ ప్రణాళికలపై దృష్టి పెట్టాలన్నారు. తక్కువ నీటితో పండే ప్రత్యామ్నాయ పంటలను ప్రోత్సహించాలని అన్నారు. అలాగే కలెక్టర్లు వర్షపాతం, భూగర్భ జలాల ప్రభావంపై లోతైన అధ్యయనం చేయాలని ఆదేశించారు.