రెండో భార్య కుమార్తెలకు వంశపారంపర్య ఆస్తిలో సమాన వాటా: హైకోర్టు

కాకినాడ జిల్లాలో ఒక కుటుంబ ఆస్తి వివాదంలో హైకోర్టు కీలక తీర్పు వెలువరించింది. తండ్రి ఆస్తిలో మొదటి భార్య కుమారుడితో సమానంగా రెండో భార్య కుమార్తెలకు కూడా వాటా హక్కు ఉంటుందని స్పష్టం చేసింది.

కాకినాడ మండలం గైగోలుపాడలో వంశపారంపర్యంగా వచ్చిన ఇల్లు, ఖాళీ స్థలం విషయంలో ఈ వివాదం నెలకొంది. ఈ ఆస్తి తురంగి సోమరాజు తండ్రి నుండి సంక్రమించింది. సోమరాజుకు మొదటి భార్యతో కుమారుడు సత్యనారాయణ ఉన్నారు. మొదటి భార్య మరణించిన తర్వాత సోమరాజు రెండో వివాహం చేసుకున్నారు. రెండో భార్యతో ఆయనకు ఆరుగురు కుమార్తెలు ఉన్నారు.

ఈ ఆరుగురు కుమార్తెలు తండ్రి సోమరాజుతో కలిసి ఆస్తిలో తమ వాటా కోరుతూ కాకినాడ ప్రిన్సిపల్ సీనియర్ సివిల్ జడ్జి కోర్టులో దావా వేశారు. ఈ కేసులో కుమారుడు సత్యనారాయణను ప్రతివాదిగా చేర్చారు. మొదట ఈ దావా కొట్టివేయబడింది. దీంతో కుమార్తెలు, సోమరాజు కాకినాడ అదనపు జిల్లా కోర్టులో మొదటి అప్పీలు వేశారు. అదనపు జిల్లా కోర్టు సత్యనారాయణ, తండ్రి సోమరాజుతో పాటు ఆరుగురు కుమార్తెలు కూడా ఆస్తిలో సమాన వాటాదారులని తీర్పు ఇచ్చింది.

ఈ తీర్పును సవాల్ చేస్తూ సత్యనారాయణ 2012లో ఆంధ్రప్రదేశ్ హైకోర్టులో రెండో అప్పీల్ చేశారు. ఆరుగురు కుమార్తెలు తన తండ్రికి పుట్టలేదని, తన తాత ఆస్తిపై వారికి హక్కు లేదని వాదించారు. అయితే సోమరాజు కోర్టుకు హాజరై తన మొదటి భార్య మరణానంతరం రెండో వివాహం చేసుకున్నట్లు, ఆమెతో తనకు ఆరుగురు కుమార్తెలు పుట్టినట్లు వివరించారు. తన కుమార్తెలంతా వాటాకు హక్కుదారులని స్పష్టం చేశారు.

ఇరుపక్షాల వాదనలు విన్న హైకోర్టు ఈ ఆస్తి సోమరాజు తండ్రి నుండి వచ్చినదని గుర్తుచేసింది. అందువలన ఆస్తిలో సోమరాజు, మొదటి భార్య కుమారుడు సత్యనారాయణ, రెండో భార్య ఆరుగురు కుమార్తెలు సమాన వాటాదారులని తీర్పు చెప్పింది. కాకినాడ అదనపు జిల్లా కోర్టు తీర్పును సమర్థిస్తూ సత్యనారాయణ అప్పీల్ను హైకోర్టు కొట్టేసింది. ఈ తీర్పు హిందూ వారసత్వ చట్టం ప్రకారం రెండో భార్య పిల్లల హక్కులను మరింత బలపరిచింది.