ఏపీ జూనియర్ డాక్టర్ల నిర్ణయం: రేపటి నుంచి అత్యవసర సేవలు నిలిపివేత

ఆంధ్రప్రదేశ్‌లో జూనియర్ డాక్టర్లు రేపటి నుంచి అత్యవసర వైద్య సేవలను నిలిపివేయాలని నిర్ణయించారు. స్టైపెండ్ పెంపు డిమాండ్‌పై ప్రభుత్వం స్పందించలేదని వారు తెలిపారు.

జూనియర్ డాక్టర్లు ఇప్పటికే ఆరు రోజులుగా సమ్మె చేస్తున్నారు. ఉదయం 10 గంటల నుంచి సాయంత్రం 5 గంటల వరకు అత్యవసరం కాని సేవలను నిలిపివేశారు. ఇప్పుడు అత్యవసర సేవలను కూడా ఆపాలని నిర్ణయించారు.

ఈ నేపథ్యంలో ప్రభుత్వ అధికారులు ముందస్తు చర్యలు చేపట్టారు. ఎమర్జెన్సీ, casualty, ICU, ఆపరేషన్ థియేటర్లలో సేవలు కొనసాగించేందుకు వైద్య సిబ్బంది సెలవులను రద్దు చేశారు. సెలవులో ఉన్న వైద్యులను విధులకు హాజరుకావాలని ఆదేశించారు.

స్టైపెండ్ విషయంలో జూనియర్ డాక్టర్లు 15 శాతం పెంపు కోరుతున్నారు. పొరుగు రాష్ట్రాల్లో 30 శాతం వరకు స్టైపెండ్ పెరిగిందని వారు చెబుతున్నారు. ప్రభుత్వ వర్గాల సమాచారం ప్రకారం 3 నుంచి 5 శాతం వరకు పెంచే అవకాశం ఉంది.

ఈరోజు సాయంత్రం 4 గంటలకు చర్చలు జరిగే అవకాశం ఉంది. చర్చలు విఫలమైతే రేపు నుంచి అత్యవసర సేవలు నిలిపివేస్తామని జూనియర్ డాక్టర్లు హెచ్చరించారు.