ఏపీ: అన్ని వ్యాపారాలకు ఒకే పోర్టల్ ద్వారా అనుమతులు; 20 లక్షల ఉద్యోగాల లక్ష్యం - మంత్రి లోకేష్

ఆంధ్రప్రదేశ్లో పరిశ్రమల ఏర్పాటు ప్రక్రియను వేగవంతం చేసేందుకు రాష్ట్ర ప్రభుత్వం చర్యలు చేపట్టింది. ఉండవల్లి నివాసంలో మంత్రి నారా లోకేష్ నేతృత్వంలో మంత్రుల బృందం సమావేశమైంది. ఈ సమావేశంలో చిన్న వ్యాపారాల నుంచి భారీ పరిశ్రమల వరకు అన్నింటికీ ఒకే పోర్టల్ ద్వారా అనుమతులు మంజూరు చేసే విధానాన్ని రూపొందించాలని మంత్రి లోకేష్ అధికారులను ఆదేశించారు.

రాష్ట్రంలో పెట్టుబడులు పెట్టేందుకు 750 పెద్ద పరిశ్రమలు ముందుకు వచ్చాయని, ఇవి వివిధ దశల్లో ఉన్నాయని, పూర్తిగా కార్యరూపం దాల్చితే యువతకు 20 లక్షల వరకు ఉద్యోగ అవకాశాలు లభిస్తాయని మంత్రి లోకేష్ తెలిపారు. పరిశ్రమలు త్వరగా గ్రౌండింగ్ అయ్యేలా అధికారులు ప్రత్యేక శ్రద్ధ పెట్టాలని సూచించారు.

నవంబర్‌లో జరగనున్న పార్టనర్‌షిప్ సమ్మిట్ నాటికి వీలైనన్ని పరిశ్రమలు గ్రౌండింగ్ చేయాలని లోకేష్ లక్ష్యంగా పెట్టుకున్నారు. గత సమ్మిట్ కంటే ఎక్కువ పెట్టుబడులు ఆకర్షించేలా దేశ విదేశాల్లో భారీ రోడ్‌షోలకు ప్రణాళికలు సిద్ధం చేయాలని అధికారులను ఆదేశించారు.