పాలమూరు నీటి విడుదలపై బీఆర్ఎస్ నిరసన; 11న నార్లాపూర్‌లో కేటీఆర్ నేతృత్వంలో భారీ ర్యాలీకి పిలుపు

పాలమూరు రంగారెడ్డి ఎత్తిపోతల పథకానికి సాగునీటి విడుదల చేయడం లేదంటూ బీఆర్ఎస్ పార్టీ నిరసనకు దిగింది. ఈ నెల 11న నార్లాపూర్ వేదికగా మాజీ మంత్రి కేటీఆర్ నేతృత్వంలో భారీ ర్యాలీ నిర్వహిస్తామని ప్రకటించింది. శ్రీశైలం జలాశయంలో నీరు అందుబాటులో ఉన్నా ప్రభుత్వం పంపులు ఆన్ చేయడం లేదని, దీంతో రైతులు తీవ్ర ఇబ్బందులు పడుతున్నారని పార్టీ ఆరోపించింది.

మాజీ మంత్రి నిరంజన్ రెడ్డి మీడియాతో మాట్లాడుతూ, పాలమూరుకు నీళ్ళు ఇవ్వాలని ప్రభుత్వాన్ని డిమాండ్ చేశారు. ‘కల్వకుర్తి లిఫ్ట్ ఇరిగేషన్ ద్వారా సాగునీరు ఇచ్చే వీలున్నా ప్రభుత్వం పట్టించుకోవడం లేదు. ఉన్న నీటిని వదలకుండా, లేని నీటి కోసం రైతులు ఆకాశం చూస్తున్నారు’ అని విమర్శించారు. సీఎం రేవంత్ రెడ్డి, నీటిపారుదల మంత్రి ఉత్తమ్ కుమార్ రెడ్డి మధ్య సమన్వయం లోపించిందని, శ్రీశైలం ఎగువన నీటిని నిలిపి ఉంచాలని ఉత్తమ్ కుమార్ ఆదేశాలిచ్చారని ఆరోపించారు.

ఈ ఆరోపణలను మంత్రి జూపల్లి కృష్ణారావు తీవ్రంగా ఖండించారు. పదేళ్లపాటు పాలమూరు ప్రాజెక్టును నిర్లక్ష్యం చేసిన బీఆర్ఎస్‌కు నీటి పంపిణీపై మాట్లాడే నైతిక హక్కు లేదన్నారు. ఎల్నినో ప్రభావంతో రాష్ట్రవ్యాప్తంగా నీటి కొరత నెలకొన్నప్పటికీ, ప్రభుత్వం ఆల్మట్టి, జూరాల ప్రాజెక్టుల నుంచి నెట్టెంపాడు, భీమా, కోయిల్ సాగర్ ఆయకట్టుకు తాగు, సాగునీరు నిరంతరం సరఫరా చేస్తోందని వివరించారు. బీఆర్ఎస్ నేతలు రాజకీయ లబ్ధి కోసమే డ్రామా ఆడుతున్నారని, పాలమూరు బిడ్డ అయిన రేవంత్ రెడ్డి ప్రాజెక్టు పూర్తి చేస్తారని స్పష్టం చేశారు.