రాష్ట్రవ్యాప్త మెగా పేరెంట్స్ టీచర్స్ మీట్: 65 లక్షల మందికి రూ.10 వేల కోట్లు పంపిణీ

ఆంధ్రప్రదేశ్‌లోని అన్ని ప్రభుత్వ పాఠశాలల్లో శనివారం మెగా పేరెంట్స్ టీచర్స్ మీట్ (పీటీఎం) నిర్వహించారు. మంత్రులు, ఎమ్మెల్యేలు వివిధ పాఠశాలల్లో ఈ సమావేశాల్లో పాల్గొన్నారు.

విద్యార్థులు, తల్లిదండ్రులు, ఉపాధ్యాయులు ఒకే చోట సమావేశమై సమస్యలు చర్చించారు. పల్నాడు జిల్లా అచ్చంపేటలోని జిల్లా పరిషత్ ఉన్నత పాఠశాలలో ఎమ్మెల్యే భాష్యం ప్రవీణ్, శ్రీకాకుళంలో ఎమ్మెల్యే గొండు శంకర్, పార్వతీపురం జిల్లా సాలూరు మండలం మామిడిపల్లి జడ్పీ స్కూల్‌లో మంత్రి సంధ్యారాణి హాజరయ్యారు.

నెల్లూరులోని మూలపేట డీఎస్ఆర్ బాలికల పాఠశాలలో జరిగిన పీటీఎంకు మంత్రి నారాయణ హాజరయ్యారు. ఈ సందర్భంగా మాట్లాడుతూ రాష్ట్రవ్యాప్తంగా 65 లక్షల మంది విద్యార్థులకు ‘తల్లికి వందనం’ పథకం ద్వారా ఇప్పటివరకు రూ.10 వేల కోట్లు అందించామని తెలిపారు. అదనంగా 5 లక్షల మంది గిరిజన విద్యార్థులకు గిరిజన సంక్షేమ శాఖ ద్వారా రూ.648 కోట్లు జమ చేసినట్లు వివరించారు.

తల్లిదండ్రులు తమ పిల్లల చదువు సమస్యలను ఉపాధ్యాయుల దృష్టికి తీసుకెళ్లి పరిష్కరించడమే ఈ సమావేశం లక్ష్యమని నారాయణ చెప్పారు. నెల్లూరు కార్పొరేషన్ పరిధిలోని 15 పాఠశాలలను దాతల సహకారంతో అభివృద్ధి చేయనున్నట్లు కూడా ప్రకటించారు.