ఏపీలో ఎన్టీఆర్ భరోసా పించన్ల పంపిణీ; ఇంటింటికీ వెళ్లి ప్రజాప్రతినిధులు అందజేత

రాష్ట్రవ్యాప్తంగా ఎన్టీఆర్ భరోసా పించన్ల పంపిణీ జరిగింది. ప్రజాప్రతినిధులు లబ్ధిదారుల ఇంటికి నేరుగా వెళ్లి పించన్లను అందజేశారు.

కర్నూల్‌లోని ఎర్రబురుజులో మంత్రి టీజీ భరత్, కడప జిల్లా జమ్మలమడుగులో ఎమ్మెల్యే ఆదినారాయణ రెడ్డి, టీడీపీ కడప పార్లమెంట్ అధ్యక్షుడు భూపేష్ రెడ్డి పించన్లు పంపిణీ చేశారు. శ్రీ సత్యసాయి జిల్లా కదిరిలో ఎమ్మెల్యే కందికుంట వెంకట ప్రసాద్, అనంతపురం జిల్లా రాయదుర్గంలో ఎమ్మెల్యే కాలవ శ్రీనివాసులు, పశ్చిమ గోదావరి జిల్లా అత్తిలి మండలం కొమ్మరిలో ఎమ్మెల్యే ఆర్మిలి రాధాకృష్ణ పించన్ల పంపిణీ కార్యక్రమంలో పాల్గొన్నారు. అనంతరం కాలవ శ్రీనివాసులు సెయింట్ ఫాల్స్ ఏరియాలో నూతన సీసీ రోడ్డుకు భూమిపూజ చేశారు.

మంత్రి టీజీ భరత్ మాట్లాడుతూ, ప్రభుత్వ అనుమతి లభించడంతో రాష్ట్రంలోకి పెట్టుబడులు వస్తున్నాయని చెప్పారు. కర్నూల్ జిల్లాలో 300 కోట్ల రూపాయలతో ఎలక్ట్రిక్ ఆటో, ద్విచక్ర వాహనాల తయారీ యూనిట్ ఏర్పాటుకు క్యాబినెట్ ఆమోదం తెలిపిందని వివరించారు. కర్నూల్ నియోజకవర్గంలో నెలకు సుమారు 8 కోట్ల రూపాయల పించన్లు పంపిణీ అవుతున్నాయని తెలిపారు.

ఎమ్మెల్యే కందికుంట వెంకట ప్రసాద్ మాట్లాడుతూ, వృద్ధులు, దివ్యాంగులకు అండగా ఉండేందుకే ముఖ్యమంత్రి పించన్లను పెంచారని పేర్కొన్నారు.