ఏపీ ఓటర్ల జాబితాలో 44.62 లక్షల మంది 'అన్‌కలెక్టబుల్' గా గుర్తింపు

ఆంధ్రప్రదేశ్‌లో ప్రత్యేక ఇంటెన్సివ్ రివిజన్ (SIR) ప్రక్రియ పూర్తయింది. ఈ ప్రక్రియలో 44,62,517 మంది ఓటర్లను 'అన్‌కలెక్టబుల్' జాబితాలో చేర్చినట్లు ఎన్నికల అధికారులు తెలిపారు.

వీరిలో 15,16,986 మంది మృతి చెందిన ఓటర్లుగా గుర్తించారు. 7,82,304 మంది ఎక్కడ ఉన్నదీ తెలియని (అన్‌ట్రేసబుల్) వర్గంలో ఉండగా, 14,27,257 మంది శాశ్వతంగా నివాసం మార్చినవారిగా నిర్ధారించారు. రెండు ప్రాంతాల్లో ఓట్లు ఉన్న వారిని 7,27,187 మందిగా గుర్తించారు. మొత్తం ఓటరు ఫారమ్‌లలో 10.72 శాతం అన్‌కలెక్టబుల్‌గా తేలింది.

జిల్లాల వారీగా చూస్తే, తిరుపతి జిల్లాలో 16.29% (2,88,289 మంది) అన్‌కలెక్టబుల్ ఓటర్లు ఉండగా, నెల్లూరు జిల్లాలో 14.73% (2,90,877), గుంటూరు జిల్లాలో 13.23% (2,38,458), కర్నూలు జిల్లాలో 13.14% (2,74,124) మంది ఈ జాబితాలో ఉన్నారు. పోలవరం జిల్లాలో మరణించిన ఓటర్ల శాతం అత్యధికంగా, మార్కాపురం నియోజకవర్గంలో అత్యల్పంగా నమోదైంది.

అన్‌కలెక్టబుల్ ఫారమ్‌ల సేకరణకు బీఎల్ఓలు ప్రయత్నాలు కొనసాగిస్తున్నారు. డిజిటలైజేషన్ ప్రక్రియ నిన్న అర్ధరాత్రి వరకు సాగింది.