APSRTC JAC నేడు కీలక సమావేశం, 30 డిమాండ్లపై ప్రభుత్వంతో చర్చ

ఏపీఎస్ఆర్టీసీ జేఏసీ ఇవాళ మధ్యాహ్నం 2 గంటలకు కీలక సమావేశం నిర్వహించనుంది. ఈ సమావేశంలో 30 డిమాండ్లతో కూడిన మెమోరాండంపై చర్చించి ప్రభుత్వానికి అందించాలని నిర్ణయించారు.

ఎలక్ట్రిక్ బస్సుల నిర్వహణను ప్రైవేట్ సంస్థలకు అప్పగించాలన్న ప్రభుత్వ నిర్ణయాన్ని వ్యతిరేకిస్తున్నట్లు జేఏసీ ప్రతినిధులు తెలిపారు. ఆపరేషన్ పూర్తిగా ఏపీఎస్ఆర్టీసీ ద్వారానే చేపట్టాలని డిమాండ్ చేశారు. స్త్రీ శక్తి పథకానికి అవసరమైన బస్సుల సంఖ్య పెంచాలని, గత దశాబ్దంగా నిర్వహించని రిక్రూట్మెంట్‌ను వెంటనే చేపట్టి ఖాళీ పోస్టులు భర్తీ చేయాలని కోరారు. పీఆర్సీ, డీఏ బకాయిలు వంటి ఇతర సమస్యల పరిష్కారానికి కూడా డిమాండ్ చేశారు.

ఇప్పటికే ఎలక్ట్రిక్ బస్సుల కోసం నాలుగు బస్ స్టేషన్లలో చార్జింగ్ పాయింట్లు, సబ్‌స్టేషన్లు దాదాపు సిద్ధమయ్యాయి. ఆగస్టు నాటికి అన్ని స్టేషన్లలో ఈ సౌకర్యాలు పూర్తి చేయాలనే లక్ష్యంతో ప్రభుత్వం పనులు చేపట్టింది. ఏపీఎస్ఆర్టీసీ పరిరక్షణ కార్యక్రమాన్ని విజయవంతం చేయాలని జేఏసీ నేతలు పిలుపునిచ్చారు.

ప్రభుత్వం నుంచి వచ్చే స్పందనను బట్టి భవిష్యత్తు కార్యచరణ ప్రకటిస్తామని కార్మిక సంఘాలు తెలిపాయి. ప్రైవేట్ నిర్వహణపై ప్రభుత్వ నిర్ణయం ఏమిటనేది ఆసక్తికరంగా మారింది.