దివ్యాంగుల సదరం స్లాట్ బుకింగ్‌లో కీలక సంస్కరణలు

దివ్యాంగుల సదరం సర్టిఫికేట్ స్లాట్ బుకింగ్‌లో AP ప్రభుత్వం కీలక సంస్కరణలు అమలు చేస్తోంది. జూలై 8 నుంచి ఏపీ సేవ పోర్టల్ ద్వారా ఒక్క క్లిక్‌తో స్లాట్ బుక్ చేసుకునే సదుపాయం తొలిసారిగా అందుబాటులోకి వస్తోంది. దీని ప్రకారం దరఖాస్తుదారులు ఇకపై తమ సొంత జిల్లా లేదా కేటాయించిన జోన్ లోని పొరుగు జిల్లాలకే పరిమితమై స్లాట్ బుక్ చేసుకోవాలి.

రాష్ట్ర వైద్య ఆరోగ్య శాఖ మంత్రి సత్యకుమార్ మాట్లాడుతూ, ఈ నెల 13వ తేదీ నుంచి ఎంపిక చేసిన ఆసుపత్రుల్లో వైకల్య నిర్ధారణ పరీక్షలు ప్రారంభమవుతాయని తెలిపారు. ఆగస్టు చివరి వరకు స్లాట్ బుకింగ్ అవకాశం ఉంటుందన్నారు. అసెస్‌మెంట్ కోసం ఆసుపత్రికి వెళ్లిన వెంటనే తప్పని సరిగా సదరం పోర్టల్‌లో హాజరు నమోదు చేసుకోవాలి. ఇలా నమోదు చేసుకుంటేనే సదరం ఐడీ యాక్టివేట్ అవుతుంది.

గతంలో స్లాట్లు లేకపోవడం, తప్పుడు బుకింగ్‌లు, వృధా వంటి సమస్యలను పరిష్కరించేందుకే ఈ మార్పులు తీసుకువచ్చామని మంత్రి వివరించారు. వైకల్య కేటగిరీపై స్పష్టత లేని దరఖాస్తుదారులు తప్పనిసరిగా అర్హత కలిగిన జనరల్ ఫిజీషియన్ నుంచి స్వీయ ధృవీకరణ పత్రం సమర్పించాలి. ఆ పత్రాల నమూనాను ఏపీ సేవ సదరం పోర్టల్‌లో ఉంచారు.

సేకండరీ హెల్త్ డైరెక్టర్ చక్రధర్ బాబు మాట్లాడుతూ, ఈ స్లాట్ బుకింగ్ సేవ పూర్తిగా ఉచితమని స్పష్టం చేశారు. స్లాట్ బుకింగ్, సర్టిఫికెట్ జారీ కోసం దళారులకు డబ్బులు చెల్లించి మోసపోవద్దని హెచ్చరించారు. జిల్లాల వారీగా స్లాట్ల లభ్యతను ప్రభుత్వ వాట్సాప్ సేవ మనమిత్ర ద్వారా తెలుసుకోవచ్చని చెప్పారు.