పుణే-ముంబై ఎక్స్‌ప్రెస్ వేపై కొండచరియలు విరిగిపడి రాకపోకలు నిలిచిపోయాయి; మహారాష్ట్రలో స్కూళ్లకు సెలవు

పుణే-ముంబై ఎక్స్‌ప్రెస్ వేలోని టన్నెల్ 2 ఎగ్జిట్ సమీపంలో కొండచరియలు విరిగిపడి రాకపోకలకు అంతరాయం ఏర్పడింది. ఘటనలో ఒక కుటుంబం చిక్కుకుపోగా, రెస్క్యూ బృందాలు వారిని సురక్షితంగా బయటకు తీశాయి.

భారీ వర్షాల నేపథ్యంలో మహారాష్ట్ర ప్రభుత్వం ఇవాళ రాష్ట్రంలోని స్కూళ్లు, కాలేజీలకు సెలవు ప్రకటించింది. పుణే, ఠాణే, రాయిగడ్, పాల్ఘర్ జిల్లాలకు వాతావరణ శాఖ రెడ్ అలర్ట్ జారీ చేసింది. ముంబైకి ఆరెంజ్ అలర్ట్ కొనసాగుతోంది.

ఎక్స్‌ప్రెస్ వేపై కాంక్రీట్ పిల్లర్లు కుప్పకూలడంతో రెండు వైపులా ట్రాఫిక్ నిలిపివేశారు. పాత ముంబై-పుణే హైవేపై వరద నీరు పొంగిపొర్లడంతో ఆ మార్గంలోనూ వాహనాల రాకపోకలను నిలిపేశారు. పోలీసులు ట్రాఫిక్‌ను ఇతర మార్గాలకు మళ్లించారు.

రైల్వే సేవలపై కూడా తీవ్ర ప్రభావం పడింది. ఖర్జత్-లోనావాలా సెక్షన్‌లో ఠాకూర్ వాడి సమీపంలో కొండచరియలు విరిగిపడడంతో 16 రైళ్లను రద్దు చేసి, 9 రైళ్లను దారి మళ్లించారు.

ముంబై మున్సిపల్ కార్పొరేషన్ ప్రజలను ఇళ్లలోనే ఉండాలని, అత్యవసరమైతే తప్ప బయటకు రావద్దని సూచించింది. రాబోయే రోజుల్లో మరింత వర్షం కురిసే అవకాశం ఉన్నందున అప్రమత్తంగా ఉండాలని అధికారులు హెచ్చరించారు.