విశాఖ ఏజెన్సీలో ఆరోరూట్ సాగు: రైతులకు అధిక ఆదాయం

విశాఖపట్నం ఏజెన్సీ ప్రాంతంలో ఆరోరూట్ (బత్రి, కస్తూరి) అనే దుంప పంట సాగు చేస్తున్నారు. ఇది పసుపు పంటను పోలి ఉంటుంది. 9 నుంచి 10 నెలల కాలం ఉండే ఈ పంటను మే-జూన్‌లో నాటుతారు.

రైతులు ఎకరాకు 10 టన్నుల పశువుల ఎరువు, 200 కిలోల వేప పిండి, ఒక టన్ను వెర్మి కంపోస్టు వాడుతున్నారు. దుంపలను ట్రైకోడెర్మా ద్రావణంలో నానబెట్టి విత్తన శుద్ధి చేస్తారు. మల్చింగ్ ద్వారా నీటి సంరక్షణ, కలుపు నివారణ చేస్తారు. 45-60 రోజుల తర్వాత జీవామృతం వేస్తారు. ఆకులు పసుపు రంగులోకి మారి ఎండిన తర్వాత పంట కోతకు సిద్ధమవుతుంది.

కోత తర్వాత దుంపలను శుభ్రం చేసి, తొక్క తీసి మెత్తగా రుబ్బుతారు. నీటిలో కడిగి పిండిని సేకరించి ఎండబెట్టి పౌడర్ తయారు చేస్తారు. ఈ పౌడర్ ను బేబీ ఫుడ్, బిస్కెట్లు, కేకులు, సూపులు, సాసులలో చిక్కదనం కోసం ఉపయోగిస్తారు. విరేచనాలు, అజీర్ణం సమస్యలకు, కాస్మొటిక్ ఉత్పత్తుల్లోనూ వాడతారు.

గిరిజన రైతులు ఇంటి వద్దే పౌడర్ తయారు చేసి విక్రయిస్తారు. పసుపు కేజీ రూ.130-140 వరకు ధర పలుకగా, ఆరోరూట్ ప్రాసెస్ చేసిన పౌడర్ కేజీ రూ.400-800 వరకు పలుకుతోంది. ఈ పంటను విస్తరించేందుకు ప్రభుత్వ ప్రోత్సాహం కావాలని రైతులు కోరుతున్నారు.