అరుణాచల్‌లో క్లౌడ్బరస్ట్: 3 మంది గల్లంతు, అసోంకు రెడ్ అలర్ట్

అరుణాచల్ ప్రదేశ్ లోయర్ సుబన్సిరి, పాపుమ్ పరే జిల్లాల్లో క్లౌడ్ బరస్ట్ సంభవించింది. ఉదయం 6 గంటల నుంచి 9 గంటల మధ్య కేవలం మూడు గంటల్లో 72.8 మిల్లీమీటర్ల వర్షపాతం నమోదైంది. యాజాలి సర్కిల్‌లోని నిప్కో పవర్ ప్రాజెక్ట్ కాలనీలో రిటైనింగ్ వాల్ కూలిపోవడంతో 18 ఇళ్లు కొట్టుకుపోయాయి. ఈ ప్రమాదంలో ముగ్గురు గల్లంతయ్యారు.

వరద కారణంగా ప్రాజెక్ట్ హెలిపాడ్ ధ్వంసమైంది. యాజాలిని కలిపే ప్రధాన హైవే వంతెన కూలిపోయింది. రహదారులన్నీ దెబ్బతినడంతో ఆ ప్రాంతం బాహ్య ప్రపంచంతో సంబంధాలు తెగిపోయాయి. రెస్క్యూ బృందాలు కాలినడకన సహాయక చర్యలు చేపట్టాయి. పలువురు ప్రయాణికులు చిక్కుకుపోయారు.

నిప్కో అధికారులు రంగనడి డ్యామ్ గేట్లు ఎత్తివేసి నీటిని విడుదల చేశారు. దీంతో దిగువన ఉన్న అసోం రాష్ట్రంలో బ్రహ్మపుత్ర, దాని ఉపనదులు ప్రమాదస్థాయిని దాటి ప్రవహిస్తున్నాయి. ధేమాజి, లఖింపూర్, సోనిత్పూర్ జిల్లాలకు రెడ్ అలర్ట్ జారీ చేశారు. గౌహతిలో ఫెర్రీ సర్వీసులు నిలిపివేశారు. నదీ తీర ప్రాంత ప్రజలను ఖాళీ చేయిస్తున్నారు. రాబోయే 24 గంటలు కీలకంగా మారాయి.