గోవా గవర్నర్ అశోక్ గజపతిరాజు: క్రీడా మైదానాలు ఇతర కార్యక్రమాలకు వాడొద్దు

గోవా గవర్నర్ పూసపాటి అశోక్ గజపతిరాజు విజయనగరంలోని విజి స్టేడియంలో జిల్లా క్రికెట్ అసోసియేషన్ కార్యాలయాన్ని ప్రారంభించారు. ఈ సందర్భంగా ఆయన మాట్లాడుతూ, క్రీడా మైదానాలను ఇతర కార్యక్రమాలకు వాడటం సరికాదని అభిప్రాయపడ్డారు. ప్రతి వ్యక్తిలోనూ ప్రతిభ ఉంటుందని, దాన్ని గుర్తించి పదును పెడితే అనుకున్న లక్ష్యాలను సాధించవచ్చని ఆయన తెలిపారు.

తన తాతగారు ఆడిన ఫుట్‌బాల్ మైదానం ప్రస్తుతం ఇండోర్ స్టేడియంగా మారిందని, కానీ అక్కడ నుంచి ఎలాంటి క్రీడాకారులు తయారుకాలేదని ఆయన గుర్తుచేశారు. ఆ స్థలం షాదీఖానాగా మారినట్లు కూడా ఆయన వ్యాఖ్యానించారు. స్పోర్ట్స్‌ను ప్రోత్సహిస్తున్నామని ప్రభుత్వం పెద్ద ప్రకటనలు చేసినా, ఫలితంగా స్పోర్ట్స్ అభివృద్ధి కాకుండా తాగుడు అలవాట్లు పెరిగాయని ఆయన విమర్శించారు.

ఈ కార్యక్రమంలో ఎంపీ కలిశెట్టి అప్పల నాయుడు, ఎమ్మెల్యే అతిథి విజయలక్ష్మి గజపతి రాజు తదితరులు పాల్గొన్నారు.