ఆసిఫాబాద్ రైతు 2.5 ఎకరాల్లో డ్రాగన్ ఫ్రూట్ సాగుతో లాభాలు గడిస్తున్నాడు

కొమరంభీం ఆసిఫాబాద్ జిల్లా ఆసిఫాబాద్ మండలానికి చెందిన రైతు శంకర్ 2.5 ఎకరాల్లో డ్రాగన్ ఫ్రూట్ సాగు చేస్తూ లాభాలు గడిస్తున్నారు.

ఎయిర్‌ఫోర్స్ ఎలక్ట్రానిక్స్ విభాగంలో పనిచేసి 2006లో స్వచ్ఛంద పదవీ విరమణ తీసుకున్న శంకర్, అనంతరం ప్రైవేట్ కంపెనీల్లో పనిచేశారు. చివరకు వ్యవసాయం చేయాలనుకుని YouTube ద్వారా డ్రాగన్ ఫ్రూట్ గురించి తెలుసుకుని 2022 లో సాగు మొదలుపెట్టారు.

పోల్ అండ్ రింగ్ పద్ధతిలో ఎకరానికి 200 పోల్స్ చొప్పున ఏర్పాటు చేసి మొత్తం 5200 మొక్కలు నాటారు. విద్యుత్, డ్రిప్ లేకుండా పోల్స్, మొక్కలు, కూలీల ఖర్చులు కలిపి సుమారు రూ.13 లక్షలు పెట్టుబడి పెట్టారు. డ్రిప్ పై 80% సబ్సిడీ లభించింది.

నాటిన ఏడాదికే 500 కిలోల మొదటి దిగుబడి వచ్చింది. రెండో ఏడాది 2-3 టన్నుల దిగుబడి వచ్చింది. ఈ ఏడాది ఇప్పటికే ఒక కోత కోయగా, రెండో కోత సిద్ధంగా ఉంది. నవంబర్ వరకు 5-6 కోతలు వస్తాయని, ఒక్కో కోతకు ఎకరానికి 2-3 టన్నుల వరకు దిగుబడి ఉంటుందని శంకర్ తెలిపారు.

పంటను సేంద్రియ పద్ధతుల్లో సాగు చేస్తున్నారు. మార్కెట్‌లో స్థానికంగా విక్రయిస్తుండగా, కొనుగోలుదారులు నేరుగా క్షేత్రానికి వచ్చి తీసుకెళ్తున్నారు.

రాష్ట్ర ప్రభుత్వం డ్రాగన్ ఫ్రూట్‌ను వాణిజ్య పంటగా గుర్తించి సమీకృత ఉద్యాన అభివృద్ధి పథకం కింద 40% సబ్సిడీ (సుమారు రూ.2.7 లక్షలు) రెండేళ్లలో 60:40 నిష్పత్తిలో అందిస్తోంది. తెలంగాణలో ఈ పండును 'గులాబీ పండు'గా నామకరణం చేశారు.

డ్రాగన్ ఫ్రూట్ 25-30 ఏళ్ల వరకు దిగుబడి ఇస్తుంది. ఓపికతో చేస్తే ఏడాదికి ఆదాయం క్రమంగా పెరుగుతుందని, తక్షణ డబ్బు ఆశించేవారు ఈ పంటలోకి రావద్దని శంకర్ సూచించారు.