వరంగల్‌లో ఒకే విద్యార్థి ఉన్న ప్రభుత్వ పాఠశాల: నెలకు లక్ష రూపాయల ఖర్చు

వరంగల్ జిల్లా వర్ధన్నపేట పట్టణంలోని కోనాపురం ప్రభుత్వ ప్రాథమిక పాఠశాలలో ప్రస్తుతం ఒకే ఒక్క విద్యార్థి చదువుతున్నాడు. ఆ విద్యార్థి రెండో తరగతి తెలుగు మాధ్యమంలో చదువుతున్న ఈరెల్లి విక్కీ పాల్.

విక్కీకి ప్రధానోపాధ్యాయుడు జగన్మోహన్ రావు ప్రతిరోజు పాఠాలు చెబుతున్నారు. విద్యార్థి పాఠశాలకు రాకపోతే స్వయంగా అతని ఇంటికి వెళ్లి తీసుకొస్తున్నారు. తల్లిదండ్రుల మాదిరిగా చూసుకుంటూ చదువు కొనసాగిస్తున్నారు.

ఐదేళ్ల క్రితం ఈ పాఠశాలలో దాదాపు 20 మంది విద్యార్థులు ఉండేవారు. గ్రామంలో ఉపాధి అవకాశాలు లేక చాలా కుటుంబాలు పట్టణ ప్రాంతాలకు వలస వెళ్లడంతో విద్యార్థుల సంఖ్య తగ్గింది. గత విద్యా సంవత్సరంలో ముగ్గురు విద్యార్థులు ఉండగా, ఇద్దరు కుటుంబాలతో వలస వెళ్లారు. దీంతో ఈ ఏడాది విక్కీ ఒక్కరే మిగిలాడు.

ఈ ఒక్క విద్యార్థి కోసం పాఠశాలలో ప్రధానోపాధ్యాయుడితో పాటు పని మనిషి, వంటమనిషి విధులు నిర్వహిస్తున్నారు. వీరి సేవలు, ఇతర నిర్వహణ ఖర్చులు కలిపి నెలకు దాదాపు లక్ష రూపాయల వరకు వ్యయమవుతోందని ప్రధానోపాధ్యాయుడు తెలిపారు.

గ్రామ ప్రజలకు స్థిరమైన ఉపాధి కల్పిస్తే వలసలు తగ్గుతాయని, పాఠశాల మళ్లీ కళకళలాడుతుందని ప్రధానోపాధ్యాయుడు ఆశాభావం వ్యక్తం చేశారు. గ్రామీణ ప్రాంతాల్లో ఉపాధి సమస్య ఎంత తీవ్రంగా ఉందో ఈ పాఠశాల పరిస్థితి గుర్తు చేస్తోంది.