తెలంగాణలో మాన్సూన్ బ్రేక్; జూలై 15 వరకు వర్షాలు ఉండవు, ఉష్ణోగ్రతలు పెరిగే అవకాశం

రాబోయే రెండు వారాల పాటు తెలంగాణలో వర్షాలు గణనీయంగా తగ్గుతాయని వాతావరణ నిపుణులు హెచ్చరిస్తున్నారు. జూలై 15 వరకు పెద్దగా వర్షం పడే అవకాశం లేదని, ఉష్ణోగ్రతలు క్రమంగా పెరిగే సూచనలు ఉన్నాయని తెలిపారు.

భారత వాతావరణ శాఖ (IMD) ప్రకారం, వాయువ్య భారతం, మధ్య భారతంతోపాటు దక్షిణ ద్వీపకల్పంలోని పలు ప్రాంతాల్లో రాబోయే 6-7 రోజులు వర్షపాతం తక్కువగా ఉంటుంది. ఇదే పరిస్థితి తెలంగాణలోనూ కనిపిస్తోంది. జూలై 18 వరకు ఋతుపవనాల పరిస్థితిలో పెద్దగా మెరుగుదల ఉండదని లైవ్ వెదర్ ఆఫ్ ఇండియా వ్యవస్థాపకుడు నవదీప్ దాహియా అభిప్రాయపడ్డారు.

జూలై రెండవ వారం తీసిన ఉపగ్రహ చిత్రాల్లో అరేబియా సముద్రం, బంగాళాఖాతం రెండింటిలోనూ మేఘాల పరిమాణం చాలా తక్కువగా ఉన్నట్లు నవదీప్ దాహియా గుర్తించారు. ఈ వాతావరణ పరిస్థితి జూలై నెలలా కాకుండా ఏప్రిల్ నెలను గుర్తుచేస్తోందని వివరించారు.

ఇటీవల దేశంలోని కొన్ని రాష్ట్రాల్లో భారీ వర్షాలు, వరదలు ప్రజలను ఇబ్బంది పెట్టాయి. కానీ ప్రస్తుతం దక్షిణాది రాష్ట్రాల్లో మాత్రం వర్షాభావం కనిపిస్తోంది. ఎండ తీవ్రతతో వడగాలులు వీచే అవకాశం ఉందని అధికారులు సూచిస్తున్నారు. రైతులు కూడా వర్షం కోసం ఎదురుచూస్తున్న తరుణంలో ఈ మాన్సూన్ బ్రేక్ ఆందోళన కలిగిస్తోంది.

ఋతుపవనాలు ఎప్పుడు మళ్లీ చురుకవుతాయో, వర్షాలు ఎప్పుడు పడతాయో ఇప్పుడే చెప్పలేమని వాతావరణ నిపుణులు తెలిపారు. ప్రస్తుతానికి జూలై 15-18 మధ్య కాలంలో వర్షం పడే అవకాశం లేదు.