తెలంగాణలో ఈ అర్ధరాత్రి నుంచి ఆటో, క్యాబ్, స్కూల్ వ్యాన్ల బంద్

తెలంగాణ వ్యాప్తంగా ఈ అర్ధరాత్రి నుంచి ఆటోలు, క్యాబ్‌లు, స్కూల్ వ్యాన్లు బంద్ చేపట్టనున్నారు. 18 సంఘాలతో ఏర్పడిన JAC ఈ బంద్‌కు పిలుపు ఇచ్చింది.

డ్రైవర్లు తమ డిమాండ్లను వివరించారు. గత 14 ఏళ్లుగా ఆటో మీటర్ రేటు పెంచలేదని చెప్పారు. ఆర్టీసీకి అనుబంధంగా తేవాలనుకునే ఎలక్ట్రిక్ ఆటోల ప్రతిపాదనను వెనక్కి తీసుకోవాలని కోరారు.

ఓలా, ఉబర్, రాపిడో బైక్ సేవలపై నిషేధం విధించాలని డిమాండ్ చేశారు. రాష్ట్రంలో గిగ్ వర్కర్స్ అగ్రిగేటర్ పాలసీ అమలు చేయాలని అన్నారు. ఆటో డ్రైవర్లకు ఏడాదికి రూ.12,000 ఆర్థిక సహాయం ఇవ్వాలని కోరారు.

ఆటో, ప్రైవేట్ రవాణా కార్మికుల సంక్షేమ బోర్డు ఏర్పాటు చేయాలన్నారు. ట్రాఫిక్ చలాన్లపై 80 శాతం సబ్సిడీ ఇవ్వాలని, ఆటో త్రీ వీలర్ లైసెన్స్‌లను పునరుద్ధరించాలని కోరారు. ప్రభుత్వం ఇప్పటివరకు స్పందించలేదని సంఘాల నాయకులు తెలిపారు.

మహాలక్ష్మి పథకం వల్ల ఆటో ఆదాయం తగ్గిందని కొందరు డ్రైవర్లు చెప్పారు. ఈ రాత్రి వరకు ప్రభుత్వం నుంచి స్పందన రాకపోతే నిరసన ఆపబోమని నాయకులు తెలిపారు. హైదరాబాద్‌తో పాటు రాష్ట్రవ్యాప్తంగా ఆటోలు, క్యాబ్‌లు, స్కూల్ వ్యాన్లు రోడ్డుపైకి రావని హెచ్చరించారు.