అయోధ్య రామ మందిరం: విరాళాల లెక్కింపు సిబ్బంది భారీగా రాజీనామా

అయోధ్య రామ జన్మభూమి తీర్థ క్షేత్ర ట్రస్ట్‌లో విరాళాల లెక్కింపు సిబ్బంది భారీగా రాజీనామా చేశారు. విరాళాల దుర్వినియోగ ఆరోపణలపై దర్యాప్తు కొనసాగుతున్న నేపథ్యంలో ఈ పరిణామం చోటు చేసుకుంది. సిబ్బందిలో సగానికి పైగా రాజీనామా చేయడంతో ప్రస్తుతం లెక్కింపు సిబ్బంది సంఖ్య 12కు తగ్గింది.

ట్రస్ట్ వర్గాల సమాచారం ప్రకారం, మొదట 40 మంది సిబ్బంది ఉండేవారు. వీరిలో 15 నుంచి 20 మంది మాత్రమే రోజూ విధులకు హాజరయ్యేవారు. ఇప్పుడు వారిలో చాలా మంది రాజీనామా చేశారు. మొత్తం 20 మందికి పైగా రాజీనామా చేసినట్టు సమాచారం. దీంతో లెక్కింపు ప్రక్రియకు ఎక్కువ సమయం పడుతోంది.

లెక్కింపు కేంద్రం వద్ద భద్రతను కట్టుదిట్టం చేశారు. ఉద్యోగులను లోపలికి అనుమతించే ముందు పలు దఫాలుగా తనిఖీ చేస్తున్నారు. అంతకుముందు ట్రస్ట్ జారీ చేసిన గుర్తింపు కార్డు ఉంటే సరిపోయేది. భద్రత కట్టుదిట్టం చేసిన తర్వాత రాజీనామాల సంఖ్య పెరగడం మరిన్ని అనుమానాలకు దారి తీసింది.

మరోవైపు, అయోధ్య విరాళాల చోరీపై నిష్పాక్షిక దర్యాప్తు జరిపించాలని కోరుతూ దాఖలైన పిటిషన్లపై సుప్రీం కోర్టు ఈ నెల 13వ తేదీన విచారణ చేపట్టనుంది.