అయోధ్య రామ మందిరంలో వెండి ఇటుకలు మాయం: సిట్ దర్యాప్తులో కీలక ఆధారాలు

అయోధ్య శ్రీరామ జన్మభూమి మందిరంలో భక్తులు సమర్పించిన వెండి ఇటుకలు, నగదు తదితర విరాళాల నిర్వహణలో అవకతవకలు జరిగాయనే ఆరోపణలపై ప్రత్యేక దర్యాప్తు బృందం (సిట్) విచారణ జరుపుతోంది. ప్రాణ ప్రతిష్ట సమయం నుంచి 60 కిలోల వెండి ఇటుకలు అధికారిక రికార్డుల నుంచి తప్పిపోయినట్లు దర్యాప్తులో తేలింది. వీటి రసీదులు, స్టోరేజ్ వివరాలు నమోదు కాలేదని అధికారులు తెలిపారు.

దాదాపు రూ.200 కోట్ల నగదు కూడా హుండీ లెక్కింపు సమయంలో సిబ్బంది తప్పిదాలతో మాయమైనట్లు ఆరోపణలు వచ్చాయి. కానుకల లెక్కింపు గదిలోని కీలక సీసీటీవీ ఫుటేజీని డిలీట్ చేసినట్లు సిట్ ప్రాథమిక ఆధారాలు కనుగొంది. ఈ వ్యవహారంపై ప్రతిపక్షాలు తీవ్రంగా స్పందించడంతో ఉత్తరప్రదేశ్ ప్రభుత్వం సిట్కు విచారణ ఆదేశాలు ఇచ్చింది.

దర్యాప్తులో ప్రధాన నిందితుడిగా రామశంకర్ యాదవ్ అలియాస్ తిన్ను యాదవ్ పేరు బయటపడింది. ఈయన శ్రీరామ జన్మభూమి తీర్థ క్షేత్ర ట్రస్ట్ జనరల్ సెక్రెటరీ చంపత్రాయ్ సన్నిహిత సహాయకుడు. ఆటో డ్రైవర్ నుంచి 50 కోట్ల విలువైన ఆస్తులు సంపాదించాడని దర్యాప్తు అధికారులు పేర్కొన్నారు. జూన్ 13న ఆయన నివాసంలో సోదాలు చేసి భారీ మొత్తంలో బంగారం, నగదు స్వాధీనం చేసుకున్నారు.

అయితే ఈ ఆరోపణలను తిన్ను యాదవ్ భార్య పూనం యాదవ్ ఖండించారు. తమ ఆస్తులన్నీ చట్టబద్ధమైనవేనని, రామ మందిర తీర్పు రాకముందే ఇల్లు నిర్మించుకున్నామని ఆమె తెలిపారు. ఇది తమపై జరుగుతున్న కుట్ర అని ఆమె ఆరోపించారు.

సిట్ బృందం 150 మందికి పైగా అనుమానితులను విచారించింది. తుది నివేదిక త్వరలో ముఖ్యమంత్రి యోగి ఆదిత్యనాథ్కు సమర్పించనుంది. తప్పు చేసిన వారిపై కఠిన చర్యలు తీసుకుంటామని ప్రభుత్వం స్పష్టం చేసింది. ఈ కేసులో ముంబై దాతలను సంప్రదించి ఆభరణాల వివరాలు సేకరిస్తున్నారు.