మంత్రి అజారుద్దీన్ డిన్నర్ పార్టీకి సీఎం రేవంత్ రెడ్డి హాజరు

హైదరాబాద్‌లోని జూబ్లీ హిల్స్‌లో మంత్రి మహమ్మద్ అజారుద్దీన్ ఈ సాయంత్రం ఒక విందు సమావేశం ఏర్పాటు చేశారు. ఈ విందుకు ముఖ్యమంత్రి రేవంత్ రెడ్డి, ఉప ముఖ్యమంత్రి మల్లు భట్టి విక్రమార్క, పలువురు మంత్రులు, ఎమ్మెల్యేలు, ఎమ్మెల్సీలు, కాంగ్రెస్ పార్టీ నేతలు హాజరవుతున్నారు.

రాజకీయంగా ఈ విందు ప్రాధాన్యత సంతరించుకుంది. రాబోయే గ్రేటర్ హైదరాబాద్ మున్సిపల్ కార్పొరేషన్ (GHMC) ఎన్నికల్లో మైనారిటీ ఓటర్లను ఆకర్షించే వ్యూహాలపై చర్చించేందుకు ఈ సమావేశం వేదిక కావచ్చని పార్టీ వర్గాలు తెలిపాయి. 2016 జీహెచ్‌ఎంసీ ఎన్నికల్లో కాంగ్రెస్‌కు రెండు మూడు స్థానాలు మాత్రమే దక్కాయి. ఈ నేపథ్యంలో ఈసారి మైనారిటీ ఓట్లను సమీకరించేందుకు ప్రయత్నాలు జరుగుతున్నాయి.

మంత్రివర్గ విస్తరణకు సంబంధించిన చర్చలు కూడా ఈ సమావేశంలో జరిగే అవకాశం ఉందని తెలుస్తోంది. ఇటీవల మంత్రి కొండా సురేఖ, మరో ఎమ్మెల్యే మధ్య తలెత్తిన వివాదం నేపథ్యంలో సీఎం రేవంత్ రెడ్డి సయోధ్య ప్రయత్నాలు చేయవచ్చని ఊహాగానాలు ఉన్నాయి.

సమావేశానికి మీడియాను అనుమతించడం లేదు. పార్టీ ప్రతినిధులు, మంత్రులు, సీఎం, డిప్యూటీ సీఎం మాత్రమే హాజరవుతున్నారు.