ఎస్ఐఆర్ ప్రక్రియపై ఎంపీ వంశీ కృష్ణ పరిశీలన

పెద్దపల్లి ఎంపీ వంశీ కృష్ణ మంచిర్యాల జిల్లా బెల్లంపల్లి పట్టణంలోని గంగారాం నగర్లో నేడు ఎస్ఐఆర్ (ఓటర్ల జాబితా ప్రత్యేక సవరణ) ప్రక్రియను పరిశీలించారు. ఓటర్లలో ఎలాంటి సందేహాలు, గందరగోళం లేకుండా చూడాలని బీఎల్ఓలకు ఆయన సూచించారు.

ఎన్యూమరేషన్ ఫారం నింపడంలో ప్రజలు ఇబ్బంది పడుతున్నారని గుర్తించిన ఎంపీ, బీఎల్ఓలు వారికి పూర్తి సహకారం అందించాలని కోరారు. ఓటర్లకు అవగాహన కల్పించేందుకు ఆయన ఇంటింటికీ తిరిగారు. ఓటు హక్కు ఒక ఆయుధం లాంటిదని, దాని ద్వారా పాలకులను ప్రశ్నించవచ్చని ఎంపీ పేర్కొన్నారు.

ఈ సందర్భంగా బెల్లంపల్లిలో ఆర్యుబి (రోడ్ అండర్ బ్రిడ్జ్) మూసివేతతో ఇబ్బందులు ఎదురవుతున్నాయని స్థానికులు ఎంపీకి ఫిర్యాదు చేశారు. వెంటనే ఆర్యుబిని పరిశీలించిన వంశీ కృష్ణ, దాన్ని త్వరలో పునఃప్రారంభించేందుకు కృషి చేస్తామని హామీ ఇచ్చారు.

అనంతరం ఎంపీ స్థానిక ప్రాథమిక ఆరోగ్య కేంద్రం (పిహెచ్సి)ని సందర్శించారు. అక్కడ పల్స్ పోలియో కార్యక్రమాన్ని పరిశీలించి, చిన్నారులకు పోలియో చుక్కలు వేయించారు. కార్యక్రమం సజావుగా కొనసాగుతోందని అధికారులు తెలిపారు.