ఫేక్ సోషల్ మీడియా పోస్టులపై ఏపీ కేబినెట్ సంచలన నిర్ణయం: ప్రత్యేక టాస్క్ ఫోర్స్ ఏర్పాటు

ఆంధ్రప్రదేశ్ మంత్రివర్గం ఫేక్ సోషల్ మీడియా పోస్టులపై కీలక నిర్ణయాలు తీసుకుంది. రాష్ట్ర డీజీపీ, సీనియర్ పోలీసు అధికారులు కేబినెట్‌కు పవర్‌పాయింట్ ప్రెజెంటేషన్ ఇచ్చారు. ప్రభుత్వం, ప్రజాప్రతినిధులపై వస్తున్న అవాస్తవ ప్రచారాలను అడ్డుకునేందుకు ఒక ప్రత్యేక టాస్క్ ఫోర్స్‌ను ఏర్పాటు చేయాలని కేబినెట్ పోలీస్ శాఖను ఆదేశించింది.

సోషల్ మీడియా నిఘా మరింత పటిష్టం చేసేందుకు బయటి నుంచి టెక్నికల్ నిపుణులను, ప్రత్యేక సిబ్బందిని నియమించుకోవాలని సూచించింది. ఇలాంటి కేసుల్లో నిందితులకు త్వరగా శిక్షలు పడేలా ప్రత్యేక పబ్లిక్ ప్రాసిక్యూటర్లను నియమించాలని ఆదేశాలు జారీ చేసింది. ఈ రోజు నుంచే సోషల్ మీడియాపై పోలీసులు కఠిన నిఘా పెట్టాలని, కేబినెట్ సబ్ కమిటీ తుది ప్రణాళిక సిద్ధం చేయాలని నిర్ణయించారు.

సమావేశంలో ముఖ్యమంత్రి చంద్రబాబు నాయుడు మంత్రులకు రాజకీయ మార్గదర్శనం చేశారు. ప్రతిపక్షం YSRCP అభివృద్ధి కార్యక్రమాలు, సూపర్ సిక్స్ పథకాల నుంచి ప్రజల దృష్టి మరల్చేందుకు సోషల్ మీడియాను ఉపయోగిస్తోందని ఆయన ఆరోపించారు. కూటమి నేతలు ఎవరూ రెచ్చగొట్టే పోస్టులకు స్పందించరాదని, ఓపికగా సంయమనంతో ఉండాలని హెచ్చరించారు.

ఇటీవల అనంతపురం, ఇతర జిల్లాల్లో జరిగిన సంఘటనలను గుర్తు చేసిన సీఎం, ప్రతిపక్ష వ్యూహాల్లో చిక్కుకోకుండా అభివృద్ధి పనులను ప్రజల్లోకి బలంగా తీసుకెళ్లాలని సూచించారు. జిల్లా ఇన్చార్జి మంత్రులు స్థానిక ఎమ్మెల్యేలతో సమన్వయం చేసుకోవాలని, భూసమస్యలు, రెవెన్యూ, ప్రజా సమస్యల పరిష్కారంపై దృష్టి పెట్టాలని ఆదేశించారు. ఈ నిర్ణయాలపై ప్రతిపక్షం స్పందన తెలియాల్సి ఉంది.