ఆర్టీఐ దరఖాస్తులు తిరస్కరించవద్దు: కమిషనర్ VSK చక్రవర్తి

ఆంధ్రప్రదేశ్ సమాచార హక్కు కమిషనర్ VSK చక్రవర్తి రాజమహేంద్రవరం నగరపాలక సంస్థ కార్యాలయాన్ని సందర్శించారు. అధికారులు ఆర్టీఐ దరఖాస్తులను ఎట్టి పరిస్థితుల్లో తిరస్కరించవద్దని ఆయన స్పష్టం చేశారు.

ఆర్టీఐ దరఖాస్తులు, రికార్డులను కమిషనర్ క్షుణ్ణంగా పరిశీలించారు. అధికారుల వివరాలు తెలిపే బోర్డును ఓ మూలన ఉంచినట్లు ఫిర్యాదు రావడంతో సంబంధిత అధికారికి షోకాస్ నోటీస్ జారీ చేశారు.

అధికారులు బాధ్యతాయుతంగా వ్యవహరించి, చట్టం ప్రకారం 30 రోజుల్లోగా కోరిన సమాచారం అందించాలని ఆయన సూచించారు. ఉద్దేశపూర్వకంగా సమాచారం నిరాకరిస్తే రూ.25 వేల వరకు జరిమానా విధించడంతో పాటు క్రమశిక్షణ చర్యలకు సిఫారసు చేసే అధికారం కమిషన్‌కు ఉందని హెచ్చరించారు.

దేవాదాయ శాఖ, వక్ఫ్, మైనారిటీ, కోఆపరేటివ్ డిపార్ట్‌మెంట్ల నిర్వహణ విషయాలపై సమాచారాన్ని ఇవ్వాల్సిందేనని చక్రవర్తి తెలిపారు. కానీ ఆలయాల ఆచారాలు, మత విశ్వాసాలకు సంబంధించిన ప్రశ్నలు ఆర్టీఐ పరిధిలోకి రావని స్పష్టం చేశారు.

ప్రజలకు, అధికారులకు ఆర్టీఐ చట్టంపై అవగాహన కల్పించేందుకు త్వరలో జిల్లాల వారీగా శిబిరాలు నిర్వహిస్తామని కమిషనర్ ప్రకటించారు.