విశాఖకు చెందిన రాధా గాయత్రి మృతి కేసులో భర్త శ్రీ చరణ్‌ను డెహ్రాడూన్ పోలీసులు అదుపులోకి తీసుకున్నారు

విశాఖపట్నానికి చెందిన రాధా గాయత్రి అనుమానాస్పద మృతి కేసులో ఆమె భర్త శ్రీ చరణ్‌ను డెహ్రాడూన్ పోలీసులు అదుపులోకి తీసుకున్నారు. డీఎస్పీ జేసీ పంత్ నేతృత్వంలో శ్రీ చరణ్‌ను విచారిస్తున్నారు. ఈ కేసులో నెల రోజులుగా పరారీలో ఉన్న శ్రీ చరణ్‌ను పోలీసులు పట్టుకున్నారు.

రాధా గాయత్రి జూన్‌ 14వ తేదీ అర్ధరాత్రి ముస్సోరీలో చనిపోయింది. ఆమెను శ్రీ చరణ్ హతమార్చాడని తల్లిదండ్రులు ఆరోపిస్తున్నారు. ఈ కేసు విచారణలో భాగంగా, శ్రీ చరణ్‌తో పాటు అతని తల్లిదండ్రులు, సోదరికి కూడా డెహ్రాడూన్ డెప్యూటీ మెజిస్ట్రేట్ ఆనంద్ నోటీసులు జారీ చేశారు. ఈ నెల 17న విచారణకు హాజరు కావాలని నోటీసుల్లో ఆదేశించారు. కానీ శ్రీ చరణ్ హాజరు కాలేదు. హాజరు కాకపోతే ఏకపక్ష విచారణ కొనసాగిస్తామని ఆ నోటీసులో పేర్కొన్నారు.

ఈ సంఘటన తీరుపై రాధా గాయత్రి తల్లిదండ్రులు అనుమానాలు వ్యక్తం చేశారు. జూన్ 14 అర్ధరాత్రి 1:36 నిమిషాలకు శ్రీ చరణ్ తమకు వాట్సాప్‌లో ఒక ఫోటో పంపినట్లు వారు తెలిపారు. జూన్‌ 15 ఉదయం 8:01 నిమిషాలకు తమ కుటుంబంతో శ్రీ చరణ్ గ్రూప్ కాల్ ద్వారా ‘రాధా గాయత్రి చనిపోయింది’ అని చెప్పాడని వివరించారు. అంతేకాక, రాధా గాయత్రి సూట్‌కేస్‌లో ఉన్న జీపీఎస్ రికార్డర్, ముస్సోరీ టూర్‌ కు సంబంధించిన వాట్సాప్‌ గ్రూప్ కాల్‌లపై కూడా వారు ప్రశ్నలు లేవనెత్తారు. ఈ అంశాలన్నీ మెజిస్ట్రేట్ విచారణలో కీలకం కానున్నాయి.

ప్రస్తుతం డెహ్రాడూన్‌లో శ్రీ చరణ్ విచారణ కొనసాగుతోంది. రాధా గాయత్రి మృతికి గల కారణాలు తెలియాల్సి ఉంది.