కాళేశ్వరం విలువ కరువులో తెలుస్తుంది: కేటీఆర్; సీఎం వైఖరిపై విమర్శ

బీఆర్ఎస్ నేత, మాజీ మంత్రి కేటీఆర్ కాళేశ్వరం ప్రాజెక్టును సమర్థించారు. కరువు పరిస్థితులు ఏర్పడినప్పుడు ఈ ప్రాజెక్టు విలువ అందరికీ అర్థమవుతుందని ఆయన అన్నారు.

ఇదే సందర్భంగా ఆయన ముఖ్యమంత్రి రేవంత్ రెడ్డిపై విమర్శలు చేశారు. గతంలో సీఎం కాళేశ్వరంను ‘కూలేశ్వరం’ అని ఎగతాళి చేశారని, అయితే ఇప్పుడు అదే ప్రాజెక్టు నుంచి వచ్చే నీటిని వాడుతున్నారని కేటీఆర్ ఆరోపించారు.

మల్లన్న సాగర్, కాళేశ్వరం ప్రాజెక్టు మధ్య ఉన్న అనుసంధానాన్ని ఆయన గుర్తు చేశారు. ‘కాళేశ్వరం లేకుంటే మల్లన్న సాగర్‌లో నీళ్లు ఉండేవి కాదు. ఇప్పుడు అక్కడి నుంచే మూసి నది పునరుజ్జీవనానికి నీరు తీస్తున్నట్లు సీఎం ప్రకటించడం విచిత్రంగా ఉంది’ అని కేటీఆర్ వ్యాఖ్యానించారు.

కాళేశ్వరం ప్రాజెక్టును కూలేశ్వరంగా మార్చేశామని గతంలో సీఎం చేసిన వ్యాఖ్యలను ఉటంకిస్తూ, ఆయన తన మాటకు కట్టుబడి లేరని కేటీఆర్ విమర్శించారు.

ఈ విషయంపై ముఖ్యమంత్రి రేవంత్ రెడ్డి స్పందన తెలియాల్సి ఉంది.