కేటీఆర్ విమర్శలపై ప్రభుత్వ విప్ బల్మూరి వెంకట్ కౌంటర్

బీఆర్ఎస్ వర్కింగ్ ప్రెసిడెంట్ కేటీఆర్ చేసిన విమర్శలకు ప్రభుత్వ విప్ బల్మూరి వెంకట్ కౌంటర్ ఇచ్చారు. ముఖ్యమంత్రి రేవంత్ రెడ్డి ఇంజనీరింగ్ విద్యార్థులపై చేసిన వ్యాఖ్యలను కేటీఆర్ వక్రీకరించారని ఆరోపించారు.

సీఎం మాట్లాడుతూ, ఇంజనీరింగ్ విద్యా విధానం విద్యార్థులకు ఉపయోగపడేలా లేదని, మార్పులు అవసరమని మాత్రమే పేర్కొన్నారని బల్మూరి వివరించారు. అయితే, సీఎం ప్రసంగం పూర్తిగా వినకుండా కేటీఆర్ ఇష్టం వచ్చినట్లు మాట్లాడుతున్నారని విమర్శించారు.

తెలంగాణలో కాంగ్రెస్ ప్రభుత్వం అధికారంలోకి వచ్చాక 80 వేలకు పైగా ఉద్యోగాలు ఇచ్చామని, 7,000 పోలీస్ పోస్టుల భర్తీకి నోటిఫికేషన్ ఇచ్చామని చెప్పారు. బీఆర్ఎస్ హయాంలో నిరుద్యోగుల ఆత్మహత్యలు జరిగాయని, ఆ కుటుంబాలకు కేటీఆర్ క్షమాపణలు చెప్పాలని డిమాండ్ చేశారు. ఈ విషయంపై కేటీఆర్ స్పందన తెలియాల్సి ఉంది.