అరటి సాగులో సరైన ఎరువుల యాజమాన్యంపై శాస్త్రవేత్త సూచనలు

అరటి సాగు విస్తీర్ణం ఇటీవల కాలంలో బాగా పెరుగుతోంది. కానీ చాలా మంది రైతులు సరైన పోషక యాజమాన్యం పాటించలేకపోతున్నారని సీనియర్ శాస్త్రవేత్త డాక్టర్ పి. సుధా జాకబ్ తెలిపారు. దీనివల్ల గెల సైజు తగ్గి ఆశించిన లాభాలు రావట్లేదు.

నాటిన తర్వాత మొదటి ఐదు నెలలు మొక్క ఎదుగుదలకు కీలకం. ఈ సమయంలో సమతుల్య ఎరువులు అందించాలి. గెల తయారయ్యే దశలో ఎన్ని హస్తాలు, కాయలు వస్తాయో నిర్ణయం అవుతుంది. కాబట్టి ప్రతి మొక్కకి సిఫార్సు చేసిన ఎరువులు నేల రకాన్ని బట్టి ఇవ్వాలి.

మొదట గుంటలో సింగిల్ సూపర్ ఫాస్ఫేట్ 300 గ్రాములు వేయాలి. దీర్ఘకాలిక రకాలైతే ప్రతి 45 రోజులకు ఒకసారి నత్రజని 50 గ్రాములు, పొటాష్ 50 గ్రాములు ఇస్తే సరిపోతుంది. స్వల్పకాలిక రకాల్లో 150-160 రోజుల లోపు 4-5 దఫాలుగా ఎరువులు వేయాలి.

టిష్యూ కల్చర్ మొక్కలైతే పెరుగుదల వేగంగా ఉంటుంది. ఎరువులు ఎక్కువ దఫాలుగా ఇవ్వాల్సి ఉంటుంది. మొదట 15, 30, 40 రోజుల వ్యవధిలో 30-32 గ్రాముల నత్రజని, 25 గ్రాముల పొటాష్ ఇవ్వాలి. 60 రోజుల తర్వాత ప్రతి 20 రోజులకు 40-45 గ్రాముల నత్రజని, 30-35 గ్రాముల పొటాషియం 80, 100 రోజులకు ఇవ్వాలి. చివరి దశలో 30 రోజుల వ్యవధిలో మూడు దఫాలు ఎరువులు అందిస్తే దిగుబడి పెరగడానికి అవకాశం ఉంటుంది.

సూక్ష్మ పోషకాల నిర్వహణ కూడా ముఖ్యం. బోరాన్ లోపం ఉంటే బోరాక్స్ 1.5 గ్రాములు లీటర్ నీటికి కలిపి పిచికారు చేయాలి. జింక్ లోపానికి 2 గ్రాముల జింక్ సల్ఫేట్, మ్యాంగనీస్ లోపానికి 2 గ్రాముల మ్యాంగనీస్ సల్ఫేట్ లీటర్ నీటికి కలిపి పిచికారు చేయాలి. ఆకు మీద నీరు జారిపోకుండా స్టికర్ (శాండవిట్ లేదా ధనవిట్) 1 మి.లీ లీటర్ కు కలపాలి.

నీటి యాజమాన్యంలో డ్రిప్ ఇరిగేషన్ ఉత్తమం. వారం లేదా 10 రోజులకు ఒకసారి నీరివ్వాలి. గెల వచ్చిన తర్వాత చివరి పువ్వును తొలగించి, 5 గ్రాముల పొటాషియం సల్ఫేట్ లీటర్ నీటికి కలిపి ప్రతి 10-15 రోజులకు పిచికారు చేయాలి. మొక్క పెరుగుదల తక్కువగా ఉంటే 5 గ్రాముల పొటాషియం నైట్రేట్ కూడా మార్చి మార్చి పిచికారు చేయవచ్చు.

ఈ యాజమాన్య పద్ధతులు పాటిస్తే ఎకరాకు 30-40 టన్నుల దిగుబడి సాధించవచ్చు. అధిక సాంద్ర పద్ధతిలో మొక్కలు నాటితే 50 టన్నుల వరకూ దిగుబడి సాధించిన రైతులు ఉన్నారని డాక్టర్ సుధా జాకబ్ తెలిపారు.