లాల్ దర్వాజా సింహవాహిని అమ్మవారి ఆలయంలో బండారు దత్తాత్రేయ ప్రత్యేక పూజలు

మాజీ హర్యాణా గవర్నర్, బీజేపీ నేత బండారు దత్తాత్రేయ పాతబస్తీలోని లాల్ దర్వాజా సింహవాహిని అమ్మవారి ఆలయాన్ని దర్శించుకున్నారు. స్థానిక నాయకులతో కలిసి ఆయన ప్రత్యేక పూజలు చేసి మొక్కులు తీర్చుకున్నారు.

ఈ సందర్భంగా ఆయన మాట్లాడుతూ, చార్మినార్ భాగ్యలక్ష్మి ఆలయంతో పాటు లాల్ దర్వాజా అమ్మవారిని దర్శించడం తన జీవితంలో ఎంతో పుణ్యంగా భావిస్తున్నానని చెప్పారు. తెలంగాణ సంస్కృతిలో భాగమైన బోనాల పండుగ అంతర్జాతీయ గుర్తింపు పొందాలని, ప్రపంచ వ్యాప్తంగా గుర్తింపు రావాలని ఆకాంక్షించారు.

అమ్మవారి కరుణతో రాష్ట్రంలో మంచి వర్షాలు కురుస్తాయని, ప్రజలు ఇబ్బందులను ధైర్యంగా ఎదుర్కొనేందుకు సహాయం చేయాలని ప్రార్థించారు. సమాజంలో నైతిక విలువలు పెరగాలని, మత్తు పదార్థాల వాడకం, మహిళలపై నేరాలు తగ్గించి తెలంగాణను సస్యశ్యామలంగా తీర్చిదిద్దాలని ఆయన కోరుకున్నారు.