గుజరాత్ అంబాజీ శక్తిపీఠంలో భాద్రపద పూర్ణిమ వేడుకలు ప్రారంభం

గుజరాత్‌లోని అంబాజీ శక్తిపీఠంలో భాద్రపద పూర్ణిమ వేడుకలు ప్రారంభమయ్యాయి. దేశం నలుమూలల నుంచి లక్షలాది మంది భక్తులు ఇక్కడకు చేరుకున్నారు. పూర్ణిమకు వారం రోజుల ముందు నుంచే భక్తులు గిరి ప్రదక్షణలు చేస్తూ అమ్మవారిని దర్శిస్తున్నారు.

అంబాజీ 51 శక్తి పీఠాల్లో ఒకటి. సతీదేవి హృదయం ఈ ప్రదేశంలో పడిందని భక్తులు విశ్వసిస్తారు. ఈ ఆలయంలో అమ్మవారికి మూల విగ్రహం ఉండదు. దాని స్థానంలో కూర్మ రూపంలో ఉన్న స్వర్ణ శ్రీ యంత్రాన్ని ప్రతిష్టించి పూజలు నిర్వహిస్తున్నారు.

శ్రీ యంత్రంపై బీజాక్షరాలు ఉన్నాయి. భక్తులు నేరుగా చూడకుండా కళ్లకు తెల్లని వస్త్రం కట్టుకుని దర్శించుకునే సంప్రదాయం కొనసాగుతోంది. ప్రధాన ఆలయానికి సమీపంలోని గబ్బర్ కొండపై అసలు పీఠం ఉందని భక్తుల నమ్మకం.

గబ్బర్ కొండ గర్భాలయంలో వెలిగే అఖండ జ్యోతిని అమ్మవారి ప్రతిరూపంగా భక్తులు భావిస్తారు. ప్రతి ఏడాది పుష్యం, మాఘ, భాద్రపద పూర్ణిమల సందర్భంగా ఇక్కడ ప్రత్యేక ఉత్సవాలు నిర్వహిస్తారు.

ప్రస్తుతం వేడుకల నేపథ్యంలో ఆలయ పరిసరాలు భక్తుల రద్దీతో నిండిపోయాయి.