చార్మినార్ భాగ్యలక్ష్మి అమ్మవారి ఖజానా కోసం భక్తుల బారులు

హైదరాబాద్‌లోని చార్మినార్ వెనుక ఉన్న భాగ్యలక్ష్మి అమ్మవారి గుడిలో దీపావళి సందర్భంగా ఖజానా పంపిణీ జరుగుతోంది. అమ్మవారి ఖజానా కోసం భక్తులు ఉదయం నుంచే పొడవైన బారుల్లో నిలబడుతున్నారు.

ఈ ఏడాది రష్ గత సంవత్సరాల కంటే ఎక్కువగా ఉందని భక్తులు చెప్తున్నారు. కొందరు ఉదయం 5 గంటలకే వచ్చి బారులో నిలబడ్డారు. మొదటి రోజు ఖజానా దొరకని కొందరు మరుసటి రోజు మళ్లీ వచ్చారు. ఇన్‌స్టాగ్రామ్‌లో ఈ ఖజానా గురించి చూసి వచ్చినవారూ ఉన్నారు.

భక్తుల్లో కొందరు మహారాష్ట్ర, రాజస్థాన్ నుంచి కూడా వచ్చారు. కొందరు 10 ఏళ్ల నుంచి, మరికొందరు 25 ఏళ్ల నుంచి ప్రతి సంవత్సరం ఇక్కడికి వస్తున్నామని తెలిపారు. అమ్మవారు గరుడ వాహనంపై బంగారు బిందెతో దర్శనం ఇస్తోంది.

ఖజానాను ఇంట్లో బీరువాలో భద్రంగా ఉంచుకుంటామని భక్తులు చెబుతున్నారు. ఇంట్లో లక్ష్మీ మాత ఉండాలని కోరుకుంటూ ఈ ఖజానాను తీసుకుంటున్నట్లు వారు వివరించారు. చార్మినార్ ప్రాంతంలో దీపావళి సమయంలో ఇది సంవత్సరాలుగా కొనసాగుతున్న సంప్రదాయం.