భైంసాలో గోశాల భూమిలో అక్రమ తవ్వకాలు — అడ్డుకున్న హిందూ సంఘాలు

నిర్మల్ జిల్లా భైంసాలోని గోశాల భూమిలో అక్రమ ఇసుక తవ్వకాలు జరుగుతున్నాయనే ఆరోపణలు వెలుగులోకి వచ్చాయి. ఘటనా స్థలికి చేరుకున్న గోశాల కమిటీ సభ్యులు, హిందూ వాహిని కార్యకర్తలు తవ్వకాలను అడ్డుకున్నారు.

ఈ గోశాల భూమి సుమారు 360 ఎకరాల విస్తీర్ణంలో ఉంది. పూర్వం దాతలు దీనిని గోశాల పేరిట దానం చేశారు. తరతరాలుగా అన్ని కులాల హిందువులు ఈ గోశాలను నిర్వహిస్తూ భూమిని సంరక్షిస్తున్నారు.

గతంలో పలుమార్లు అధికారులకు ఫిర్యాదు చేసినా చర్యలు తీసుకోలేదని కమిటీ సభ్యులు ఆరోపించారు. కలెక్టర్, సబ్ కలెక్టర్, రెవెన్యూ, పోలీసు అధికారులు వెంటనే స్పందించి అక్రమ తవ్వకాలకు పాల్పడిన వారిపై చర్యలు తీసుకోవాలని డిమాండ్ చేశారు. భూమి, పర్యావరణ పరిరక్షణ కోసం తగిన చర్యలు చేపట్టాలని కోరారు.