సీతారామ ప్రాజెక్టు పనులను పరిశీలించిన డిప్యూటీ సీఎం భట్టి, మంత్రులు

తెలంగాణ డిప్యూటీ సీఎం భట్టి విక్రమార్క, రెవెన్యూ మంత్రి పొంగులేటి శ్రీనివాస్ రెడ్డి, మంత్రి ఉత్తమ్ కుమార్ రెడ్డి ఖమ్మం జిల్లా మనుగూరులోని సీతారామ లిఫ్ట్ ఇరిగేషన్ ప్రాజెక్ట్ టేకాఫ్ పాయింట్ వద్ద ఈరోజు క్షేత్రస్థాయి పరిశీలన నిర్వహించారు.

ప్రాజెక్టు పనుల పురోగతి తెలుసుకున్న మంత్రులు పంప్ హౌజ్‌లు, మోటార్లు, వివిధ ప్యాకేజీ వర్క్‌లను పరిశీలించారు. ఎక్కడ పనులు నిలిచిపోయాయి, ఏ అంశాల్లో జాప్యం జరిగిందనే వివరాలు అధికారులను అడిగి తెలుసుకున్నారు.

ఈ ప్రాజెక్టు ద్వారా ఉమ్మడి ఖమ్మం జిల్లా, సూర్యాపేట, మహబూబాబాద్ జిల్లాలకు గోదావరి నీరు లభించి సాగు, తాగునీటి కొరత తీరుతుంది. ఎల్ నినో ప్రభావంతో రైతులు ఇబ్బందులు పడుతున్న నేపథ్యంలో పనులు వేగవంతం చేయాలని మంత్రులు అధికారులకు సూచించారు.

ప్రాజెక్టుకు భూములు కోల్పోయిన రైతుల పరిహారం చెల్లింపులో కొంత మంది అధికారులు నిర్లక్ష్యం వహిస్తున్నారని రైతుల వద్ద నుంచి ఫిర్యాదులు వచ్చాయి. పట్టాదారు పాస్‌బుక్‌లు లేకపోయినా, పోడు భూములు కోల్పోయిన వారికీ న్యాయం చేస్తామని మంత్రులు భరోసా ఇచ్చారు.

ఈ సందర్భంగా మంత్రులు అధికారులతో సమీక్ష సమావేశం నిర్వహించారు. ప్రాజెక్టు నిర్మాణానికి అవసరమైన నిధుల కేటాయింపు, ఇంకా పూర్తికాని ప్యాకేజీలపై దిశానిర్దేశం చేశారు.

అనంతరం సత్తుపల్లి మండలంలోని యాతాలకుంట టన్నెల్ పనులను కూడా మంత్రులు సందర్శించనున్నారు. అక్కడ పనులు పరిశీలించి, నీటి సరఫరాలో ఇబ్బందులను నివారించేందుకు చర్యలు తీసుకోనున్నారు.