కాళేశ్వరం ప్రాజెక్టు ఖర్చు రూ.1.47 లక్షల కోట్లు, ప్రాజెక్టు విఫలమైందని భట్టి విక్రమార్క

తెలంగాణ డిప్యూటీ ముఖ్యమంత్రి భట్టి విక్రమార్క, కాళేశ్వరం ప్రాజెక్టు నిర్మాణంలో BRS ప్రభుత్వం భారీగా నిధులు దుర్వినియోగం చేసిందని ఆరోపించారు. ప్రాజెక్టు ఖర్చు రూ.1.47 లక్షల కోట్లకు పెరిగిందని, అయినా రైతులకు నీళ్లు అందించలేకపోయిందని ఆయన పేర్కొన్నారు.

ఆయన ఇచ్చిన ప్రసంగంలో, గతంలో కాంగ్రెస్ ప్రభుత్వం ప్రతిపాదించిన అంబేద్కర్ ప్రాజెక్టు అంచనా వ్యయం రూ.38,000 కోట్లు కాగా, అప్పటికే రూ.11,000 కోట్లు ఖర్చు చేసినట్లు తెలిపారు. మిగతా రూ.27,000 కోట్లతో ప్రాజెక్టు పూర్తి చేస్తే 16.5 లక్షల ఎకరాలకు సాగునీరు, ఏడు జిల్లాలకు తాగునీరు, హైదరాబాద్ పరిశ్రమలకు నీరు అందేవని వివరించారు.

కానీ BRS ప్రభుత్వం ప్రాజెక్టు పేరు కాళేశ్వరంగా మార్చి, ఖర్చును రూ.1.47 లక్షల కోట్లకు పెంచిందని, ఫలితంగా మేడిగడ్డ, అన్నారం, సుందిళ్ల వంటి బ్యారేజీలు నీటి ఒత్తిడిని తట్టుకోలేక కొట్టుకుపోయాయని భట్టి విక్రమార్క విమర్శించారు. కాంగ్రెస్ ప్రభుత్వం నిర్మించిన పాత ప్రాజెక్టులు 100 టీఎంసీల పైన సామర్థ్యం ఉన్నా ఇప్పటికీ చెక్కు చెదరలేదని ఆయన చెప్పారు.

BRS నాయకులు సోషల్ మీడియా, నమస్తే తెలంగాణ, టి న్యూస్, పయనీర్ పత్రికల ద్వారా కాంగ్రెస్ ప్రభుత్వంపై తప్పుడు వార్తలు ప్రచారం చేస్తున్నారని ఆయన ఆరోపించారు. ఇటువంటి వ్యక్తులు మళ్లీ గ్రామాల్లోకి వస్తే రాష్ట్రం సర్వనాశనం అవుతుందని హెచ్చరించారు.

కాగా, సీతారామ ప్రాజెక్టు విషయంలో కాంగ్రెస్ ప్రభుత్వం రాజీవ్ కెనాల్ నిర్మించి, వైరా చెరువుకు నీళ్లు తరలించడం ద్వారా రైతులకు ఉపయోగపడేలా చేసిందని భట్టి విక్రమార్క తెలిపారు.