సీతారామ ప్రాజెక్ట్ పూర్తి చేస్తాం: డిప్యూటీ సీఎం భట్టి విక్రమార్క

డిప్యూటీ సీఎం భట్టివిక్రమార్క ఖమ్మం జిల్లాలోని సీతారామ ప్రాజెక్ట్ స్థలాన్ని సందర్శించారు. కాంగ్రెస్ ప్రభుత్వం ఈ ప్రాజెక్టును ఎట్టి పరిస్థితుల్లోనూ పూర్తి చేస్తుందని ఆయన స్పష్టం చేశారు.

ఈ సందర్భంగా ఆయన మాట్లాడుతూ, గతంలో వైఎస్ రాజశేఖర్ రెడ్డి ప్రభుత్వం ఈ ప్రాంతంలో రాజీవ్ సాగర్, ఇందిరా సాగర్ లిఫ్ట్ ఇరిగేషన్ ప్రాజెక్టులను రూ.3,505 కోట్ల అంచనా వ్యయంతో ప్రారంభించిందని తెలిపారు. అప్పటికే రూ.2,000 కోట్లు ఖర్చు కాగా, మిగిలిన పనులు చేపట్టేందుకు కేవలం రూ.1,505 కోట్లు సరిపోతుందని ఆయన పేర్కొన్నారు.

అయితే, అనంతరం టీఆర్ఎస్ (ప్రస్తుతం బీఆర్ఎస్) ప్రభుత్వం ప్రాజెక్ట్ డిజైన్‌ను పూర్తిగా మార్చి, సీతమ్మ సాగర్ బ్యారేజీని కూడా అనుసంధానించిందని భట్టి విమర్శించారు. ఈ పునర్‌రూపకల్పనతో ప్రాజెక్ట్ వ్యయం దాదాపు రూ.24,000 కోట్లకు పెరిగిందని ఆయన ఆరోపించారు. ఈ వ్యవహారాన్ని అప్పట్లోనే కాంగ్రెస్ శాసనసభలో తీవ్రంగా వ్యతిరేకించిందని గుర్తుచేశారు.

ప్రస్తుతం ఎక్కువ డబ్బు ఖర్చయి, పనులు బాగా ముందుకు వచ్చినందున, ప్రాజెక్టును ఆపడం సరికాదని ప్రభుత్వం నిర్ణయించిందని డిప్యూటీ సీఎం తెలిపారు. ఇప్పుడు ఎన్ఎస్పీ కాలువకు లింకు, రాజీవ్ కెనాల్, పాలేరు రిజర్వాయర్ ద్వారా సంతపల్లి వరకు నీటిని తీసుకెళ్లే కార్యక్రమం వేగవంతం చేస్తున్నామన్నారు. నిధుల కొరత లేకుండా ప్రాజెక్టును పూర్తి చేసి, జిల్లా రైతులకు సాగునీరు అందించడమే లక్ష్యమని స్పష్టం చేశారు.

బీఆర్ఎస్ నేతల స్పందన తెలియాల్సి ఉంది.