సింగరేణి గనులకు ఆధునిక సాంకేతికత: అమెరికా పర్యటనలో భట్టి విక్రమార్క

తెలంగాణ ఉపముఖ్యమంత్రి భట్టి విక్రమార్క నేతృత్వంలో సింగరేణి సంస్థ ఉన్నతాధికారులతో కూడిన ఒక బృందం అమెరికాలో పర్యటిస్తోంది. టెక్సాస్, అరిజోనా రాష్ట్రాల్లోని మైనింగ్ యంత్రాల తయారీ కేంద్రాలను అధికారులు సందర్శించారు.

ఈ పర్యటన ప్రధాన లక్ష్యం సింగరేణి గనుల్లో భద్రత మెరుగుపరచడం, అంతర్జాతీయ స్థాయి ఆధునిక సాంకేతికతను తీసుకురావడం. ముఖ్యంగా, ప్రమాదకరమైన ప్రాంతాల్లో మాన్యువల్ పనిని తగ్గించే 'టెలీ-రిమోట్ ఆపరేషన్' టెక్నాలజీపై ప్రత్యేక దృష్టి పెట్టారు.

తర్వాత లాంగ్ వ్యూలోని కొమాట్సు మైనింగ్ కార్పొరేషన్ (Komatsu Mining Corp.) సౌకర్యాన్ని సందర్శించి, భారీ యంత్రాల తయారీ, అసెంబ్లింగ్ ప్రక్రియలను క్షుణ్ణంగా పరిశీలించారు.

ఇటీవల సింగరేణి సంస్థ రెండు కొత్త బొగ్గు బ్లాక్‌లను సొంతం చేసుకుంది. జయశంకర్ భూపాలపల్లి జిల్లా తాడిచెర్లలో ఓపెన్‌కాస్ట్ బ్లాక్ (182 మిలియన్ టన్నుల నిల్వలు, 40-50 ఏళ్ల జీవితకాలం) నామినేషన్ పద్ధతిలో లభించింది. భద్రాద్రి కొత్తగూడెం జిల్లా మనుగూరులోని పీకేఓసీటీ డీప్ సైడ్ బ్లాక్ (180 మిలియన్ టన్నులు, 25 ఏళ్ల జీవితకాలం) వేలం ద్వారా సంపాదించింది. ఈ రెండు బ్లాక్‌లు సింగరేణి ఉత్పత్తి సామర్థ్యాన్ని పెంచనున్నాయి.