భీమవరం సోమేశ్వర జనార్ధన స్వామి ఆలయంలో కార్తిక మాసోత్సవాలు ప్రారంభం

పశ్చిమ గోదావరి జిల్లా భీమవరం గునుపూడిలోని శ్రీ ఉమా సోమేశ్వర జనార్ధన స్వామి దేవాలయంలో కార్తిక మాస మహోత్సవాలు నవంబర్ 10 నుంచి ప్రారంభమయ్యాయి. ఈ వేడుకలు డిసెంబర్ 8 వరకు కొనసాగుతాయి. ఈ ఆలయం పంచారామ క్షేత్రాల్లో ఒకటి.

కార్తిక మాసం మొదటి రోజు స్వామివారికి మహన్యాసపూర్వక ఏకవార రుద్రాభిషేకం, ఏకాదశ రుద్రాభిషేకం నిర్వహించారు. పాలోదకం, పుష్పోదకాలతో విశేష అభిషేకం చేశారు. ప్రతి రోజు తెల్లవారుజామున 3:30 గంటల నుంచే దేవస్థానంలో కార్యక్రమాలు మొదలవుతాయి. ఈరోజు సాయంత్రం ధ్వజస్తంభం వద్ద ఆకాశదీపం కార్యక్రమం నిర్వహిస్తారు. తర్వాత ధీర ధూప సేవ, నీరాజనం, మంగళ హారతితో రోజు కార్యక్రమాలు ముగుస్తాయి.

ఈ క్షేత్రంలో అమ్మవారు అన్నపూర్ణ పైన, సోమేశ్వర స్వామి కింద ఉండటం విశేషం. చంద్రుడు ప్రతిష్ఠ చేసిన క్షేత్రం కావడంతో పౌర్ణమికి లింగం తెల్లని కాంతితో, అమావాస్యకు నలుపు రంగులో కనిపిస్తుందని ప్రధానార్చకుడు రామకృష్ణ శర్మ తెలిపారు. ఆలయ ప్రాంగణంలో ఆంజనేయ స్వామి, నవగ్రహాలు, కుమారస్వామి, సూర్యనారాయణ మూర్తి, సుబ్రహ్మణ్యేశ్వర స్వామి ఉపాలయాలు ఉన్నాయి.

దేవాదాయ ధర్మాదాయ శాఖ కమిషనర్ కే రామచంద్ర మోహన్ ఆదేశాల మేరకు భక్తులకు ఉచిత దర్శనం, ఉచిత ప్రసాదం ఇస్తున్నారు. ఉదయం 11 గంటల నుంచి ఉచిత అన్నప్రసాద వితరణ జరుగుతుంది. ఉచిత క్యూ లైన్‌తో పాటు ₹50, ₹100, ₹200 క్యూ మార్గాలు కూడా ఏర్పాటు చేశారు.

నవంబర్ 6న భీమవరం ఆర్డీఓ అధ్యక్షతన వివిధ శాఖల అధికారులతో సమీక్షా సమావేశం జరిగింది. మున్సిపల్, ఎలక్ట్రిసిటీ, ఆర్ అండ్ బీ, ఆరోగ్య శాఖలు ఒక నెల పాటు తమ వంతు ఏర్పాట్లు చేస్తున్నాయి. పంచారామ యాత్రికులు ఏ సమయంలో వచ్చినా దర్శనం అయ్యేలా ఏర్పాట్లు చేసినట్టు ఆలయ అధికారులు తెలిపారు.