భోగాపురం ఎయిర్‌పోర్ట్: విశాఖలో వెయిటింగ్ లాంజ్‌లతో చెక్-ఇన్ సౌకర్యం

భోగాపురం అంతర్జాతీయ విమానాశ్రయం నుంచి ప్రయాణించే వారికి మరిన్ని సౌకర్యాలు రానున్నాయి. విశాఖపట్నంలో వెయిటింగ్ లాంజ్‌లు ఏర్పాటు చేస్తున్నట్లు నిర్మాణ సంస్థ జీఎమ్మార్ ప్రకటించింది. ఈ లాంజ్‌లలో చెక్-ఇన్, బోర్డింగ్ పాస్ సౌకర్యం అందుబాటులో ఉంటుంది.

దేశంలోనే తొలిసారిగా విమానాశ్రయానికి దూరంగా ఇలాంటి సేవలు ప్రారంభం కానున్నాయి. ప్రస్తుతం విమానాశ్రయం నగరానికి 60 కిలోమీటర్ల దూరంలో ఉంది. డెడికేటెడ్ కారిడార్ లేకపోవడంతో ప్రయాణికులు ఇబ్బందులు పడుతున్నారు. ఈ సమస్యను పరిష్కరించేందుకు జీఎమ్మార్ ఈ లాంజ్‌లను ఏర్పాటు చేస్తోంది.

ఈ నెలాఖరులోగా విశాఖలోని 5 ప్రధాన ప్రాంతాల్లో లాంజ్లు ప్రారంభమవుతాయి. త్వరలో మరో 4 చోట్ల ప్రారంభిస్తారు. వీటిలో ఆర్టీసీ ఈవీ బస్సులు ప్రయాణికులను పికప్ చేసి నేరుగా విమానాశ్రయానికి చేరుస్తాయి. ఈ సేవతో టాక్సీలతో పోలిస్తే ఖర్చు తగ్గుతుంది. సుమారు ₹500 కే విమానాశ్రయం చేరుకోవచ్చని జీఎమ్మార్ తెలిపింది.

భోగాపురం విమానాశ్రయం మరోసారి ట్రయల్ రన్‌కు సిద్ధమైంది. ఈ నెల 29న డీజీసీఏ డైరెక్టర్ జనరల్ పర్యటించనున్నారు. ఆ రోజు ట్రయల్ రన్ నిర్వహించే అవకాశం ఉంది.

విమానాశ్రయంలో ఏరోనాటికల్ మెటీరోలాజికల్ స్టేషన్ ఏర్పాటు చేశారు. విమానాల టేకాఫ్, ల్యాండింగ్ సమయంలో వాతావరణ బులెటిన్లు అందించడానికి ఈ స్టేషన్ ఉపయోగపడుతుంది.

భోగాపురం విమానాశ్రయం జూలై మొదటి వారంలో ప్రారంభం కావొచ్చని అధికారులు భావిస్తున్నారు. అయితే ఇప్పటివరకు దీనిపై షెడ్యూల్ ఖరారు కాలేదు.