అల్లూరి ఇంటర్నేషనల్ ఎయిర్‌పోర్టు పేరులో భోగాపురం, విజయనగరం లేదంటూ నిరసన

భోగాపురంలో నిర్మించిన కొత్త విమానాశ్రయానికి ‘అల్లూరి సీతారామరాజు ఇంటర్నేషనల్ ఎయిర్‌పోర్ట్, విశాఖపట్నం’గా కేంద్రం అధికారికంగా నామకరణం చేయడంపై వివాదం మొదలైంది. ఈ పేరులో భోగాపురం, విజయనగరం జిల్లా ప్రస్తావనను తొలగించడాన్ని విజయనగరం జిల్లా వాసులు, ప్రతిపక్ష నేతలు తప్పుబడుతున్నారు.

విమానాశ్రయం నిర్మించిన స్థలాన్ని విజయనగరం జిల్లా రైతులు ఇచ్చారని, వారి త్యాగాన్ని గుర్తించి భోగాపురం లేదా విజయనగరం పేరు ఉండాలని వారు డిమాండ్ చేస్తున్నారు. పూర్తిగా విశాఖపట్నం బ్రాండింగ్‌తో జిల్లా గుర్తింపు కోల్పోతుందని ఆందోళన వ్యక్తం చేశారు.

ఈ విషయంపై మంత్రి కొండపల్లి శ్రీనివాసరావు స్పందిస్తూ, పౌర విమానయాన నిబంధనల ప్రకారం సమీపంలోని ప్రధాన నగరం పేరుతోనే విమానాశ్రయాలను నామకరణం చేస్తారని వివరించారు. రంగారెడ్డి జిల్లాలోని శంషాబాద్ విమానాశ్రయానికి హైదరాబాద్ పేరు పెట్టిన ఉదాహరణను ప్రస్తావించారు. విశాఖపట్నం పెద్ద నగరం కావడంతోనే ఆ పేరు ఇచ్చినట్లు తెలిపారు.

అయితే స్థానికులు, 2026 జనవరి 4న కమర్షియల్ వ్యాలిడేషన్ ఫ్లైట్ సందర్భంగా ‘భోగాపురం ఇంటర్నేషనల్ ఎయిర్‌పోర్ట్’ అనే కటౌట్‌ను ప్రదర్శించారని, ఈ ఒక్క ఏకపక్ష మార్పు సరికాదని వాదిస్తున్నారు. జిల్లా గుర్తింపు కోసం విజయనగరం పేరు చేర్చాలని పట్టుబడుతున్నారు.