వర్షాల కారణంగా నెల్లూరులో విద్యార్థుల సైకిళ్ల పంపిణీ వాయిదా

వర్షాల కారణంగా నెల్లూరులో విద్యార్థులకు సైకిళ్ల పంపిణీ కార్యక్రమాన్ని వాయిదా వేస్తున్నట్లు మంత్రి నారాయణ తెలిపారు. వాతావరణం అనుకూలిస్తే ఈ వారం శుక్రవారం (24) లేదా శనివారం (25) తేదీన సైకిళ్లు అందజేస్తామని ఆయన వెల్లడించారు.

నెల్లూరు VRC గ్రౌండ్లో సైకిళ్ల పంపిణీ ఏర్పాట్లను మంత్రి నారాయణ శనివారం పరిశీలించారు. నారాయణ గ్రూప్ తరపున నెల్లూరు కార్పొరేషన్ పరిధిలో 8, 9, 10వ తరగతి విద్యార్థులకు సుమారు 7,000 సైకిళ్లు ఇవ్వాలని నిర్ణయించారు. నగరంలోని 15 హై స్కూళ్లతో పాటు గ్రామీణ ప్రాంతాల విద్యార్థులకు కూడా ఈ పథకం వర్తిస్తుంది.

సోమవారం పంపిణీ చేయాలని అనుకున్నా, భారీ వర్షం కారణంగా మైదానం నీటిలో నిలిచిపోవడంతో కార్యక్రమం వాయిదా పడింది. వర్షం సూచనను బట్టి రాబోయే శుక్ర, శనివారాల్లో సైకిళ్లు అందజేస్తామని మంత్రి వివరించారు.

ఏడవ తరగతి చదివే విద్యార్థులకు సంక్రాంతి సెలవుల తర్వాత సైకిళ్లు ఇవ్వనున్నట్లు మంత్రి నారాయణ తెలిపారు. ట్రాఫిక్ పరిస్థితులను దృష్టిలో ఉంచుకుని చిన్న పిల్లలకు జనవరిలో ఇచ్చేలా ప్రణాళిక రూపొందించామని ఆయన చెప్పారు.