సంగారెడ్డి జిల్లాలో కర్ణాటక నుంచి చెత్త తరలింపు; గ్రామస్తుల ఆందోళన, రోడ్డు దిగ్బంధం

తెలంగాణ-కర్ణాటక సరిహద్దు గ్రామమైన సంగారెడ్డి జిల్లా నాల్కల్ మండలం మల్గిలో బీదర్ మున్సిపాలిటీ చెత్తను డంపింగ్ చేయడంపై తీవ్ర ఉద్రిక్తత నెలకొంది. సోమవారం సుమారు 40 నుంచి 50 వాహనాల్లో కర్ణాటక నుంచి టన్నుల కొద్ది చెత్తను తరలించి రోడ్డుపై వేయడంతో స్థానికులు అడ్డుకున్నారు.

రోడ్డుపై చెత్త పారబోయడంతో ఇరు రాష్ట్రాల మధ్య రాకపోకలు నిలిచిపోయాయి. గ్రామస్తులు వాహనాలను ఆపి ఆందోళన చేపట్టగా, బీదర్కు చెందిన అధికారులు బెదిరింపులకు పాల్పడ్డారని స్థానికులు ఆరోపించారు. సమాచారం అందుకున్న రెవెన్యూ, పోలీసు అధికారులు సంఘటనా స్థలానికి చేరుకుని పరిస్థితిని సద్దుమణిచారు.

స్థానికుడు మాట్లాడుతూ, ‘బీదర్ నుంచి 50కి పైగా చెత్త వాహనాలు తీసుకువచ్చి మాపై దౌర్జన్యం చేశారు. రోడ్డును పూర్తిగా బ్లాక్ చేశారు. ఇలాంటి ఘటనలు పునరావృతం కాకుండా ప్రభుత్వమే శాశ్వత పరిష్కారం చూపాలి’ అని డిమాండ్ చేశారు. అధికారుల జోక్యంతో కొద్దిసేపటికి రాకపోకలు పునరుద్ధరించబడ్డాయి. ఈ ఘటనపై బీదర్ మున్సిపల్ అధికారుల స్పందన తెలియాల్సి ఉంది.