భగవద్గీత, యోగా సంస్థలకు బిగ్ రిలీఫ్.. మద్రాస్ హైకోర్ట్ సంచలన తీర్పు!

భగవద్గీత బోధన మరియు యోగా ప్రచారం మతపరమైన కార్యకలాపాల కిందకి రాదని మద్రాస్ హైకోర్ట్ చారిత్రాత్మక తీర్పు వెలువరించింది. విదేశీ విరాళాల నియంత్రణ చట్టం అనగా FCRA కింద మత ప్రచారానికి విదేశీ నిధులు వినియోగించకూడదనే నిబంధన ఉంది. అయితే ఈ నిబంధనను సాకుగా చూపి భగవద్గీత మరియు యోగా నేర్పే స్వచ్ఛంద సంస్థల విదేశీ నిధులను నిలిపివేయడం సరికాదని న్యాయస్థానం స్పష్టం చేసింది.

భగవద్గీత కేవలం ఒక మతానికి చెందిన గ్రంథం కాదని, అది మనిషికి కర్తవ్యాన్ని మరియు నైతికతను నేర్పే విద్యాసంబంధమైన అద్భుత గ్రంథమని కోర్ట్ పేర్కొంది. అదేవిధంగా యోగా శారీరక మరియు మానసిక ఆరోగ్యానికి సంబంధించిన ఒక విజ్ఞానం అని తెలిపింది.

భారతదేశ నాగరికత ఆధునిక మతాల కంటే పురాతనమైనది కాబట్టి మన సంస్కృతిని కేవలం మతం అనే పరిమిత పరిధిలోకి నెట్టివేయడం సరికాదని కోర్ట్ స్పష్టంగా పేర్కొంది. ఈ తీర్పు భగవద్గీత మరియు యోగా బోధించే సంస్థలకు పెద్ద ఊరటగా నిలిచింది.