ఫర్టిలైజర్ ఫ్రాంచైజీ పేరుతో మోసాలు: బీహార్ ముఠా అరెస్ట్

ఫర్టిలైజర్స్ ఫ్రాంచైజీలో భాగస్వామ్యం ఇస్తామని చెప్పి మోసాలు చేస్తున్న బీహార్ ముఠాను పోలీసులు అరెస్టు చేశారు. అభిషేక్ కుమార్, అశుతోష్ కుమార్, నిషు కుమార్, రితేష్ కుమార్, అభినాష్ కుమార్ అనే ఐదుగురు నిందితులుగా ఉన్నారు.

ఆదిలాబాద్ జిల్లాకు చెందిన ఓ వ్యక్తికి ఫర్టిలైజర్స్ ఫ్రాంచైజీలో వాటా ఇస్తామని నిందితులు చెప్పారు. వ్యాపారం కోసం ప్రముఖ కంపెనీ ద్వారా రుణం ఇప్పిస్తామని నమ్మించారు. ఈ మాయమాటలతో బాధితుడి నుంచి రూ.3,85,000 తీసుకున్నారు. డబ్బులు ఇచ్చిన తర్వాత స్పందన లేకపోవడంతో బాధితుడు పోలీసులను ఆశ్రయించాడు.

విచారణలో ఈ ముఠాపై దేశవ్యాప్తంగా 500 కేసులు ఉన్నట్లు పోలీసులు గుర్తించారు. ఒక్క తెలంగాణలోనే 100కి పైగా కేసుల్లో వీరు నిందితులుగా ఉన్నట్లు పోలీసుల సమాచారం సూచిస్తోంది. నిందితుల నుంచి 10 ఫోన్లు, రూ.70,000 నగదును పోలీసులు స్వాధీనం చేసుకున్నారు. వారి పేరిట ఉన్న షేర్ మార్కెట్ ఖాతాల్లోని రూ.8 లక్షలను సీజ్ చేశారు.