బీజాపూర్ అడవుల్లో మావోయిస్టు డంప్ రట్టు: 711 BGL షెల్స్ స్వాధీనం

ఛత్తీస్‌గఢ్‌లోని బీజాపూర్ జిల్లాలో భద్రతా బలగాలు మావోయిస్టుల డంప్‌ను రట్టు చేశాయి. అడవిలో దాచి ఉంచిన 711 BGL (బ్యారెల్ గ్రెనేడ్ లాంచర్) షెల్స్‌ను స్వాధీనం చేసుకున్నాయి.

నవంబర్ 5 అర్ధరాత్రి అందిన విశ్వసనీయ సమాచారం మేరకు ఈ సెర్చ్ ఆపరేషన్ జరిగింది. బీజాపూర్ జిల్లా పోలీసులు, CRPF 196వ బెటాలియన్, 204 కోబ్రా బెటాలియన్ కలిసి ఈ ఆపరేషన్ నిర్వహించాయి. హుసూరు పోలీస్ స్టేషన్ పరిధిలోని తాడపాల గ్రామంలో ఉన్న ఫార్వర్డ్ ఆపరేటింగ్ బేస్ సమీప అడవుల్లో తనిఖీ చేశారు.

తాడపాల క్యాంపుకు వాయువ్య దిశలో సుమారు 1.5 కిలోమీటర్ల దూరంలో ఉన్న కేజీ హిల్స్ అడవిలో ఈ షెల్స్ లభ్యమయ్యాయి. నిర్ణీత భద్రతా ప్రమాణాలు, మార్గదర్శకాలు పాటిస్తూ పేలుడు పదార్థాలను సురక్షితంగా స్వాధీనం చేసుకున్నట్లు అధికారులు తెలిపారు.

ఆ ప్రాంతంలో మరిన్ని పేలుడు పదార్థాలు దాచి ఉండొచ్చని భద్రతా వర్గాలు అనుమానిస్తున్నాయి. కర్రేగుట్ట చుట్టుపక్కల కొండ ప్రాంతాలకు ప్రస్తుతానికి వెళ్లవద్దని పోలీసులు స్థానిక ప్రజలను విజ్ఞప్తి చేశారు. డంప్ లభించిన ప్రాంతాన్ని సురక్షితంగా మార్చేందుకు త్వరలోనే డీమైనింగ్ ఆపరేషన్ చేపట్టనున్నారు.

ఛత్తీస్‌గఢ్-తెలంగాణ సరిహద్దుల్లోని కర్రేగుట్ట కొండలు గతంలో మావోయిస్టు సంస్థల అగ్రనేతలకు సురక్షిత ప్రాంతాలుగా ఉండేవి. గత ఏడాది ఏప్రిల్-మే నెలల్లో ఇదే ప్రాంతంలోని దట్టమైన అడవుల్లో బలగాలు 21 రోజుల పాటు విస్తృత ఆపరేషన్ నిర్వహించాయి. ఆ ఆపరేషన్‌లో కనీసం 31 మంది మావోయిస్టులు మృతి చెందినట్లు సమాచారం.