సంగారెడ్డి తాగునీటి సరఫరాలో 70-80% తగ్గుదల: కమిషనర్ శ్రీనివాస్ రెడ్డి

సంగారెడ్డి పట్టణానికి తాగునీటి సరఫరా గతంతో పోలిస్తే 70 నుంచి 80 శాతం తగ్గిందని పురపాలక కమిషనర్ శ్రీనివాస్ రెడ్డి తెలిపారు. వర్షాభావ పరిస్థితుల వల్ల మంజీరా, సింగూరు రిజర్వాయర్లలో నీటి లభ్యత బాగా తగ్గిపోయిందని ఆయన చెప్పారు.

మంజీరా నుంచి వచ్చే ఇంటేక్ వాల్వును మూసివేశామని కమిషనర్ తెలిపారు. దానికి బదులుగా తాళ్లపల్లి మిషన్ భగీరథ నుంచి 1 MLD సామర్థ్యం ఉన్న పైప్‌లైన్ ద్వారా ఓల్డ్ టౌన్‌కు రోజు విడిచి రోజు నీటిని అందిస్తున్నారు. న్యూ టౌన్‌లోని ఏడు ట్యాంకులు మిషన్ భగీరథపై ఆధారపడి ఉన్నాయి. సింగూరు నుంచి వచ్చే నీటితో ఈ ట్యాంకులను నింపుతున్నారు.

ప్రస్తుత పరిస్థితిలో డిసెంబర్ వరకు తాగునీరు అందించగలమని శ్రీనివాస్ రెడ్డి చెప్పారు. ఆ తర్వాత కొంత ఇబ్బంది తలెత్తే అవకాశం ఉందని ఆయన అన్నారు. ఈ విషయాన్ని జిల్లా కలెక్టర్‌కు, ఇంచార్జ్ మంత్రికి తెలియజేశామని, దాని ప్రకారం చర్యలు తీసుకుంటున్నామని తెలిపారు.

నీటిని పొదుపుగా వాడాలని ప్రజలకు ప్రచార రథాల ద్వారా అవగాహన కల్పిస్తున్నారు. ఇంకుడు గుంతల ప్రాధాన్యతను కూడా వివరిస్తున్నారు. ఎక్కువ నీరు వాడే బల్క్ వినియోగదారులను నియంత్రించాలని కలెక్టర్ ఆదేశాలు ఇచ్చారని కమిషనర్ చెప్పారు. ఆ దిశగా స్విమ్మింగ్ పూల్స్‌ను మూసివేస్తున్నారు. నీటిని వృథా చేస్తే జరిమానా విధిస్తామని హెచ్చరిస్తున్నారు. ఓపెన్ ట్యాప్‌ల నుంచి నీరు లీక్ కాకుండా చర్యలు తీసుకుంటున్నారు. పట్టణంలోని ప్రతి బోర్‌వెల్‌కు లైన్‌మెన్‌ను ఇంచార్జ్‌గా నియమించారు. ఉదయం ఒక గంట, సాయంత్రం ఒక గంట మాత్రమే బోర్ నీటిని వాడాలని సమయాలు నిర్ణయించారు. దీనివల్ల భూగర్భ జలాలు తగ్గే అవకాశం తగ్గుతుందని కమిషనర్ చెప్పారు.

పట్టణంలో భూగర్భ జలాలు కూడా తగ్గినట్టు నివేదికలు ఉన్నాయని ఆయన తెలిపారు. బైపాస్ రోడ్డు ప్రాంతంలో దాదాపు 1,000 అడుగుల వరకు తవ్వినా బోర్ నీరు రావడం లేదని చెప్పారు. నీరు పుష్కలంగా ఉన్న ప్రాంతాల్లో బోర్‌వెల్‌లు వేసి, పైప్‌లైన్ లేదా ట్యాంకర్ల ద్వారా నీటిని అందించే ప్రణాళిక ఉందని తెలిపారు. మంజీరా ఎండిపోవడం సంగారెడ్డి పట్టణంతో పాటు హైదరాబాద్, సికింద్రాబాద్ జంట నగరాలను కూడా ప్రభావితం చేస్తోందని కమిషనర్ పేర్కొన్నారు.